Франциялик 85 ёшли нафақахўр шифокор қабулига кетаётганда йўлдан адашиб, Хорватияга бориб қолди. Бу ҳақида BILD нашри маълум қилди.

Унда айтилишича, Францияда яқин атрофдаги шифокор кўригига боришни режалаштирган 85 ёшли эркак ўз автомобилида уйидан тахминан 25 километр узоқликда жойлашган Ҳерваулт шаҳрига йўл олган. Бироқ йўналишни йўқотиши оқибатида шарқ томонга қараб ҳаракатланган.

Маълум бўлишича, нафақахўр 24 соат давомида автомобиль бошқарган. У Францияни тарк этиб, бир нечта Европа мамлакатлари чегараларини кесиб ўтганини ҳам сезмаган. Эркакнинг ўзи бу ҳолатнинг қандай содир бўлганини тушунмаётганини таъкидлаган.

«Илгари ҳеч қачон хотира билан боғлиқ муаммолардан азият чекмаганман. Ўзимни жуда яхши ҳис қилганман. Бу ерга қандай келиб қолганимни тушунмаяпман», — деган у.

Нафақахўрнинг йўқолиши дастлаб ҳеч қандай хавотир уйғотмаган. Бироқ у дўстлари билан учрашиш учун бормаган. Бу эса турли хавотирларни келтириб чиқарган. Вазиятдан хабар топган қўшнилар ҳам хавотирга тушиб, воқеа ҳақида полицияга мурожаат қилган.

Полиция нафақахўрнинг телефон сигнали орқали жойлашган манзилини аниқлаган ва у билан алоқага чиққан. Айни пайтда 85 ёшли нафақахўр ўз уйига қайтарилиши кутилмоқда.