Мактабгача ва мактаб таълими ҳамда Рақамли технологиялар вазирлиги ҳамкорлигида Фарғона вилоятидаги таълим муассасалари ўқувчилари иштирокида “IT соҳаси ва келажак касблари” мавзусида очиқ дарслар ташкил этилмоқда.

Марғилон шаҳрида жойлашган вилоят IT-паркда Тошлоқ тумани мактабларидан келган 100 нафарга яқин ўқувчилар иштирокида юзма-юз мулоқот ўтказилди. Унда баркамол авлод вакиллари ушбу соҳада тажрибали мутахассислар билан суҳбатлашиб, ўқув курслари фаолиятини бевосита кузатиш имконига эга бўлишди.

— Ўзаро келишув асосида барча шаҳар-туманлар ўқувчилари иштирокида вилоят IT-паркда мунтазам равишда амалий машғулотлар ўтказиб борилади, — дейди Фарғона вилояти мактабгача ва мактаб таълими бошқармаси ахборот хизмати раҳбари Одилжон Жалолов. — Шу тариқа вилоятда ушбу йўналишда истеъдодли ёшларни аниқлаш ҳамда уларнинг билим ва ғояларини фаол қўллаб-қувватлаш мақсад қилинган.

Ботир МАДИЁРОВ, “Халқ сўзи”.