«Ўзбеккино» Миллий агентлигида Президент томонидан шу йил 7 апрелда имзоланган кино санъати ва саноати тараққиётига хизмат қилувчи муҳим ҳужжатлар мазмун-моҳияти ва аҳамиятига бағишлаб ўтказилган анжуман қатнашган кинорежиссёр Баҳодир Одилов ушбу Фармон ва қарор моҳияти ҳақида ўз фикрини билдирди.

«Бугун биз, киноижодкорлар учун ҳаяжонли кун — ҳақиқатан ҳам тарихий воқелик бўлди. Ўтган ўттиз йил давомида кино санъати тараққиётига оид бундай муҳим ҳужжатлар қабул қилинмаган эди. Ҳужжатлар билан танишиб чиқдим, илк таассурот шуки, бу имкониятлар, бизга катта масъулият ҳам юклайди, албатта.

Фармон ва қарор билан соҳадаги мавжуд муаммолар бартараф этилмоқда. Энди биз, киноижодкорлар фақат ғайрат билан ишлашимиз, ватанпарварлик керак. Тўғри тушунинг, бу, шунчаки баландпарвоз сўз эмас, чин кўнгилдан айтилаётган изҳордир.

Тан олиш керак, охирги пайтларда «оғир карвон» бўлиб қолган эдик. Давлатимиз раҳбари ҳужжатларда белгиланган имконият ва имтиёзларга жавобан, биздан ўзгача шиддат ва ҳаракатни, соҳада ўзгариш қилишимизни кутади. Ишончим комилки, шу соҳа тараққиётига бел боғлаган барча ижодкорлар бир тан-у бир жон бўлиб ҳаракат қилсак, албатта, кино санъати ва саноатини янги поғонага олиб чиқа оламиз» — дейди кинорежиссёр.