Иллюстратив фото

Нукусда каналда чўкаётган 18 ёшли қиз қутқариб қолинди. Бу ҳақда Миллий гвардия матбуот хизмати хабар берди.

Маълум қилинишича, жорий йилнинг 20 октябрь куни соат 16:10 ларда Нукус шаҳар ҳудудидан оқиб ўтувчи «Дўстлик» каналида пиёдалар ўтиш учун мўлжалланган кўприкдан ўтаётган фуқаро А.А. сувда чўкаётган қизни кўриб қолган. Шундан сўнг у ушбу ҳудудга яқин бўлган Марказий деҳқон бозорида хизмат ўтаётган Миллий гвардия ходимларига хабар берган.

Миллий гвардия ходимларининг тезкор ҳаракати ва хабар берган фуқаронинг ёрдами билан чўкаётган 18 ёшли Г.Қ. (қиз) қутқариб олиниб, унга биринчи тез тиббий ёрдам кўрсатилган.

Шунингдек, чақирувга асосан манзилга етиб келган тез тиббий ёрдам орқали Г.Қ. Нукус шаҳридаги Республика шошилинч тиббий марказига олиб борилган.

Ҳозир қизнинг аҳволи яхши, дейилади хабарда.

Қўшимча қилинишича, ҳозирги кунда мазкур ҳолат юзасидан Нукус шаҳар ИИБ ходимлари томонидан суриштирув ишлари олиб борилмоқда.