Ғайрат ОТАЖОНОВ/«Халқ сўзи». Нукус шаҳридаги «Оқ қуш» мажмуасида IV Тошкент халқаро инвестиция форумининг давоми сифатида Қорақалпоғистоннинг инвестицион салоҳиятини тақдим этишга бағишланган форум ўтказилди.

Унда Қорақалпоғистон Республикаси Жўқорғи Кенгесининг Раиси Аманбай Оринбаев сўзга чиқиб, Президентимизнинг алоҳида эътибори туфайли Қорақалпоғистонда тадбиркорликни ривожлантириш ва қўллаб-қувватлаш, инвестицион жозибадорликни ошириш бўйича қабул қилинган фармон ва қарорлар асосида яратилган имкониятларни таъкидлаб ўтди.

Форумда республикамизнинг инвестицион жозибадорлиги, янги лойиҳаларни амалга ошириш имкониятлари, мавжуд ресурслар ва бошқа муҳим йўналишлар ҳақида сўз юритилди.

«Оқ қуш» мажмуаси ҳудудидаги махсус павильонда Қорақалпоғистонда ишлаб чиқарилган маҳсулотлар кўргазмаси намойиш этилди.

Форум имкониятларни муҳокама қилиш, ишбилармонлик алоқаларини ўрнатиш ва қўшма лойиҳаларни амалга ошириш учун ўзига хос майдонга айланди.

Тадбир иштирокчилари «QORAQALPOQ BASALTWOOL» корхонаси, И.В.Савицкий номидаги Қорақалпоғистон давлат санъат музейида ҳам бўлиб, республикамизнинг саноат, туризм йўналишларидаги имкониятлари билан танишди.