НАТОнинг янги Бош котиби Марк Рютте лавозимга киришганидан кейин биринчи расмий сафарида Украинага ташриф буюрди. У Киевда Украина президенти Владимир Зеленский билан учрашди ва ташкилот ва Киев ўртасидаги муҳим масалаларни муҳокама қилди. Бу ҳақда AP ахборот агентлиги хабар берди.

Маълум бўлишича, янги котиб ва президент муҳокамалари чоғида ҳаво ҳужуми сиреналари икки марта ишлаб кетган. Рютте Украинани қўллаб-қувватлашни давом эттиришга ваъда бери ҳам айтилмоқда. У Ғарбнинг Украинани қўллаб-қувватлашини сақлаб қолиш учун АҚШнинг бўлажак президенти билан ҳамкорлик қилишига ишонч билдирди.

Шунингдек, келаси ҳафта Германияда бўлиб ўтадиган НАТОнинг муҳим йиғилишида янги ҳарбий ёрдам масаласи муҳокама қилиниши ҳам маълум қилинган. Зеленский Украинанинг «ғалаба режаси» тафсилотлари билан ўртоқлашиб, Марк Рюттедан кўпроқ қурол, хусусан, узоқ масофага мўлжалланган ракеталарга эҳтиёжи борлигини билдирган.

Қайд этилишича, Украина президенти, шунингдек, Яқин Шарқдаги можаронинг Украинанинг уруш ҳаракатларига таъсиридан хавотир билдирди. У Эрон томонидан етказиб берилган ракеталар ва учувчисиз самолётлар Украинага қарши қўлланилаётганини айтган. Зеленский Ғарб давлатларини Украинанинг Россия ҳудудига чуқурроқ зарба бериш учун Ғарб етказиб берган қуроллардан фойдаланишига қўйилган чекловларни олиб ташлашга чақирди.

Рютте Украина НАТО аъзолигига ҳар қачонгидан ҳам яқинроқ эканини билдирган. У Украинанинг алянсга қўшилиши йўлидаги қадамлар сифатида НАТОнинг хавфсизлик келишувлари ва молиявий ёрдам каби сўнгги ҳаракатлари ҳақида айтмоқда.

Россиянинг янги авлод бомбаларининг хавфи ортиб бораётганига жавобан, Зеленский Ғарбдан кўпроқ ҳарбий ёрдам олиш зарурлигини яна бир бор таъкидлади. Бу бомбалар Москванинг ҳужумларида ҳалокатли воситага айланган. Россиянинг тобора ортиб бораётган ютуқларига қарамай, Украина ҳар куни трансчегаравий ҳаво ҳужумларига дуч келишда давом этмоқда.

Аввалроқ, айрим ҳудудларда боғ яратмаганлар учун ер солиғи 3 бараварга оширилиши ҳақида хабар берилганди.