Фото: AP

НАТО давлатлари томонидан молиялаштирилган АҚШ ҳарбий юкларининг биринчи партияси Украинага етказилмоқда. Бу ҳақда «Reuters» агентлиги ўз манбаларига таяниб хабар берди.

«Иттифоқчилар билан тузилган янги молиявий келишув бўйича сотиб олинган АҚШ ҳарбий техникасининг биринчи жўнатмалари аллақачон Украинага етиб боряпти», — деб ёзди нашр.

Қайд этилишича, бу НАТО давлатлари ва АҚШ ўртасидаги Киевга ёрдам бўйича келишувга мувофиқ тўртта ёрдам пакетининг биринчисидир. Уни шу йилнинг 16 сентябрь куни АҚШ президенти Дональд Трамп маъмурияти маъқуллаганди.

«Трамп маъмурияти томонидан тақдим этилган АҚШнинг Украинага ҳарбий ёрдамининг биринчи пакети маъқулланди ва Вашингтон Киевга қурол сотишни қайта бошлагани сабабли тез орада етказилиши мумкин», — дея ёзганди «Reuters».

Жорий йилнинг 24 июль куни АҚШ президенти Вашингтон ва Европа Иттифоқи ўртасида келишувга эришилгани ҳақида маълум қилди. Унга кўра Европа давлатлари барча ҳарбий техника нархининг 100 фоизини тўлайди. Европа Иттифоқи қуролларни олади ва кейин тарқатади. Трампнинг таъкидлашича, қуролларнинг катта қисми Украинага кетади.

«Улар (европаликлар – таҳр.) бу пулни АҚШдаги бизнинг мудофаа компанияларимизга сарфлайди. Биз эса (қурол – таҳр.) уларга жўнатамиз, улар эса биз юборган жиҳозларни тарқатишади. Очиғи, бу уч йил олдин содир бўлиши керак эди», — деганди ўшанда Трамп.