Фото: AP

Украинадаги уруш НАТО давлатлари ҳаво ҳужумидан мудофаага кўпроқ сармоя киритиши кераклигини кўрсатмоқда. Бу фикрларни НАТО бош котиби Марк Рютте айтиб ўтди.

Унинг таъкидлашича, потенциал душманларни ишончли тўхтатиб туриш учун НАТОга аъзо давлатлар ҳаво ҳужумидан мудофаа қобилиятини 400 фоизга, яъни беш баробар ошириши керак.

Рютте НАТО давлатларини коллектив хавфсизлик соҳасида “квант сакраш” қилишга чақириб, альянс дуч келаётган таҳдидлар Украинадаги уруш тугаганидан кейин ҳам йўқолмаслиги ҳақида огоҳлантирди.

“Ҳаво ҳужуми ва ракеталарга қарши мудофаани 400 фоизга ошириш зарур. Биз Украинада Россия қандай қилиб ҳаводан ваҳима қилаётганини кўряпмиз, шунинг учун осмонимизни ҳимоя қилувчи қалқонни мустаҳкамлаймиз. Бизнинг ҳарбийларимизга минглаб зирҳли техника ва танклар, миллионлаб артиллерия снарядлари ҳам керак ва биз логистика, таъминот, транспорт ва тиббий ёрдам каби қўллаб-қувватлаш имкониятларини икки баравар оширишимиз керак”, — дейди Рютте.

Бош котиб альянсга таҳдидлар ҳақида гапирар экан, “орзулар бизни хавф-хатардан ҳимоя қила олмайди”, дея огоҳлантиради.

“Умид стратегия эмас. Шунинг учун НАТО кучлироқ, адолатлироқ ва қўрқинчли иттифоққа айланиши керак”, — дейди у.

Аввалроқ АҚШ мудофаа вазири Пит Хегсет НАТО мамлакатлари мудофаа харажатларини сезиларли даражада ошириш бўйича келишувга эришишини кутаётганини айтган эди.

“Иттифоқчилар ялпи ички маҳсулотнинг 5 фоизини мудофаа харажатларига ажратиш бўйича консенсусга жуда яқин”, — деганди у НАТО мудофаа вазирлари йиғилишида.

НАТО бош котиби Марк Рютте таклифига кўра, 2032 йилга бориб альянс давлатлари ялпи ички маҳсулотнинг камида 3,5 фоизини мудофаа ва яна 1,5 фоизини мудофаа инфратузилмасига сарфлашлари керак. Германия ва Франция бу таклифга аллақачон рози бўлган.

Айни пайтда Хегсет 24-26 июнь кунлари Гаагада бўлиб ўтадиган иттифоқ саммитида бу масалада ҳамма бир фикрга келишига умид қилмоқда.