ОФК Элит Осиё Чемпионлар Лигасида 4-тур ўйинлари старт олди. Ўзбекистон чемпиони — Қаршининг «Насаф» жамоаси ўз майдонида БААнинг «Ал-Ваҳда» клубини қабул қилди.

Учрашув бугун, 3 ноябрь куни Қаршидаги Марказий стадионда бўлиб ўтди. Кескин курашлар остида ўтган баҳсда мезбонлар сўнгги дақиқаларда 1:2 ҳисобида мағлубиятга учради.

Биринчи бўлимда «Насаф» вакиллари ташаббусни қўлга олди ва 42-дақиқада Сардор Баҳромов жарима майдони ичидан йўллаган аниқ зарбаси билан ҳисобни очди — 1:0.

Иккинчи бўлим аввалидан бошлаб меҳмонлар фаол ўйин намоён этди. 52-дақиқада «Ал-Ваҳда» ҳужумчиси Фавор Огбу жарима майдонидаги шиддатли вазиятдан фойдаланиб, ҳисобни тенглаштирди.

Ўйин охирида «Насаф»да бир неча бор яхши имкониятлар бўлди, аммо рақиб сўнгги дақиқаларда ғалабани тортиб олди. 89-дақиқада БАА клуби яримҳимоячиси Кайо аниқ зарба билан «Насаф» дарвозасини ишғол этди — 1:2.

Бу Рўзиқул Бердиев жамоасининг мусобақадаги қаторасига тўртинчи мағлубияти бўлди. Ҳозирда «Насаф» турнир жадвалида сўнгги ўринни банд этиб турган бўлса, «Ал-Ваҳда» 10 очко билан пешқадамлар сафида кетмоқда.

Маълумот учун, «Насаф» кейинги ўйинни 24 ноябрь куни ўз майдонида Эроннинг «Трактор S.C.» клубига қарши ўтказади.