OFK Elit Osiyo Chempionlar Ligasida 4-tur oʻyinlari start oldi. Oʻzbekiston chempioni — Qarshining “Nasaf” jamoasi oʻz maydonida BAAning “Al-Vahda” klubini qabul qildi.

Uchrashuv bugun, 3-noyabr kuni Qarshidagi Markaziy stadionda boʻlib oʻtdi. Keskin kurashlar ostida oʻtgan bahsda mezbonlar soʻnggi daqiqalarda 1:2 hisobida magʻlubiyatga uchradi.

Birinchi boʻlimda “Nasaf” vakillari tashabbusni qoʻlga oldi va 42-daqiqada Sardor Bahromov jarima maydoni ichidan yoʻllagan aniq zarbasi bilan hisobni ochdi — 1:0.

Ikkinchi boʻlim avvalidan boshlab mehmonlar faol oʻyin namoyon etdi. 52-daqiqada “Al-Vahda” hujumchisi Favor Ogbu jarima maydonidagi shiddatli vaziyatdan foydalanib, hisobni tenglashtirdi.

Oʻyin oxirida “Nasaf”da bir necha bor yaxshi imkoniyatlar boʻldi, ammo raqib soʻnggi daqiqalarda gʻalabani tortib oldi. 89-daqiqada BAA klubi yarimhimoyachisi Kayo aniq zarba bilan “Nasaf” darvozasini ishgʻol etdi — 1:2.

Bu Roʻziqul Berdiyev jamoasining musobaqadagi qatorasiga toʻrtinchi magʻlubiyati boʻldi. Hozirda “Nasaf” turnir jadvalida soʻnggi oʻrinni band etib turgan boʻlsa, “Al-Vahda” 10 ochko bilan peshqadamlar safida ketmoqda.

Maʼlumot uchun, “Nasaf” keyingi oʻyinni 24-noyabr kuni oʻz maydonida Eronning “Traktor S.C.” klubiga qarshi oʻtkazadi.