2023 йил 1-центабр куни Наманган халқаро аэропорти учиб келиш терминалининг тантанали очилиш маросими бўлиб ўтди. Янгиланган терминал “Uzbekistan Airways” авиакомпаниясининг Екатеринбург — Наманган йўналиши бўйича HY9830 рейсининг дастлабки 171 нафар йўловчисини ҳамда Тошкентдан Наманганга учган Silk Avia US501 рейсининг 63 нафар йўловчисини қабул қилди.

“Бугун биз Наманган аэропортида янги учиб келиш залини очиш учун йиғилдик. Менимча, халқаро парвозларни амалга ошириш имконияти ҳамда бошимиз узра осуда осмон бўлиши мустақилликнинг бир кўринишидир”, — деди Наманган вилояти ҳокими Шавкат Абдуразоқов тадбирнинг тантанали қисмни бошлаб.

Учиб келиш залида йўловчиларга хизмат кўрсатишнинг умумий майдони 720 кв.м дан 1756 кв.м гача ошди. Шундан 1365 кв.м. халқаро рейслар йўловчиларига ва 391 кв.м. ички рейсларга хизмат кўрсатиш учун.
Шу тариқа, терминалнинг ўтказиш қобилияти 3 бараварга ошиб 100 тадан, энг тиғиз вақтда 300 та йўловчига хизмат кўрсата олиш имкониятига эга бўлди.

“Бугун сиз кўриб турган Наманган халқаро аэропортининг янги терминали қисқа муддатларда реконструкция қилиниб, фойдаланишга топширилди. Бугунги кунга қадар эришган барча кўрсаткичларимиз “Uzbekistan Airports”нинг рақобатбардошлигини янада оширади ва халқаро аэропортларни минтақавий авиация хабларига айлантириш учун замин яратади”, — деди “Uzbekistan Airports” акциядорлик жамияти бошқаруви раиси вазифасини вақтинчалик бажарувчи Жавлон Умархўжаев.

Шунингдек, реконструкция доирасида учиб келиш терминалига янги багаж ленталари, чегара назорати кабиналари, тежамкор сув иситгичлари, совитиш тизимлари ва ер ости иситиш радиаторлари ўрнатилди. Аэропорт терминали устига энергия тежовчи қуёш панеллари ўрнатилди, улар терминалнинг умумий эҳтиёжининг 30 фоизигача электр энергиясини таъминлайди. Бундан ташқари, 100 та тўхташ жойига мўлжалланган янги автоматлаштирилган автотураргоҳ очилди.

“Янги терминални реконструкция қилишда маҳаллий материаллардан кенг фойдаланилган ҳолда йўловчиларга хизмат кўрсатиш сифати бўйича халқаро стандартларга жавоб берадиган барча шарт-шароитларни яратадиган тарзда қурдик. Фарғона водийсидаги халқаро аэропортлар орасида биринчи бўлиб қуёш панелларини ўрнатганимиздан фахрланамиз ва нафақат ҳамкасбларимиз, балки аҳоли ўртасида ҳам электр энергиясини тежаш тенденциясини яратишимизга ишончимиз комил. Бундан буён шаҳар аҳолиси ва юртимиз меҳмонларини аэропорт хизматларининг илғор технологияларига эга янгиланган терминал кутиб олишидан жуда мамнунмиз”, — дея хулоса қилди Наманган халқаро аэропорти директори Қобилжон Абдуназаров.

Қайд этиш жоизки, иккинчи босқич — жўнаб кетиш терминалининг реконструкция ишлари 2023 йил сентябрь ойида бошланади.