Иккинчи энг енгил вазн тоифасида WBA йўналиши бўйича вақтинчалик чемпион Муроджон Аҳмадалиев «Boxing Scene» нашрига интервью берди.

Ушбу интервьюда чарм қўлқоп устамиз яна бир бор дивизионнинг мутлақ чемпиони Наоя Иноуэ ҳақида гапирди.

«Мен буни ҳар доим айтганман: боксда қоидалар бор. Мен у билан жанг қилмоқчиман. Мен мажбурий даъвогарман. Икки йўналиш бўйича собиқ чемпионман. Энг яхши жангларни ўтказаётган ҳам менман. Бу вазндаги энг яхши боксчи — Иноуэ. Негадир бу жанг ҳеч қачон бўлмайдигандек туйилмоқда»,— дейди Аҳмадалиев.

Маълумки, Муроджон Аҳмадалиев икки йилдан бери япониялик боксчига жанг чақириғи йўллаб келади. Иноуэ шу вақт оралиғида бирор марта Аҳмадалиевнинг чорловларига аниқ жавоб берган эмас.

«18 ой ичида WBA томонидан қўйилган учта мажбуриятни бажардим. Иноуэ жанг қилишни истамаса, мен нима ҳам қила оламан? Буюк чемпионлар ҳар доим ўз камарларини ҳимоя қилишган. Иноуэнинг баҳоналарини эшитиш кулгили. Мен дунёдаги энг яхши жангчига қарши ринга кўтарилиш учун ҳар қандай жойга боришга тайёрман», — деб қўшимча қилади боксчи.

Аввалроқ, WBA ташкилоти президенти Хильберто Мендоса Иноуэ 24 январь кунги жангини ўтказиб олганидан кейин мажбурий равишда Муроджон Аҳмадалиевдан чемпионлик камарларини ҳимоя қилишига топшириқ берган эди. Шунга қарамай Аҳмадалиев ва Иноуэ ўртасидаги жангнинг ташкил этилиши сўроқ остида қолмоқда.

Шунингдек, «Matchroom Boxing» промоутерлик компанияси раҳбари Эдди Хирн WBA раҳбарлари япониялик жаҳон чемпионидан камарини олиб қўйиши шартлигини айтган.

Британиялик промоутернинг сўзларига кўра, иккинчи енгил вазн тоифасида мутлақ жаҳон чемпиони бўлиб турган Наоя Иноуэ WBA камари учун мажбурий даъвогар Муроджон Аҳмадалиевга қарши жанг ўтказишдан очиқчасига қочмоқда.

Эслатиб ўтамиз, 15 декабрь куни Муроджон Аҳмадалиев мексикалик Рикардо Эспиноса устидан ғалаба қозониб WBA Интерим камари соҳибига айланган эди.