«Microsoft Build 2025» конференциясида компания «Windows» операцион тизими учун мўлжалланган «Microsoft Store» дўконида иловалар чоп этиш учун энди рўйхатдан ўтиш тўлови олинмаслигини эълон қилди. Ушбу ўзгариш 2025 йил июн ойидан кучга киради ва якка тартибдаги дастурчилар «Microsoft Store»га бепул аъзо бўлиб, ўз иловаларини жойлаштириш имкониятига эга бўладилар.

Аввалроқ «Microsoft» дастурчилардан тахминан 19 АҚШ доллари миқдорида рўйхатдан ўтиш тўлови оларди. Эндиликда бу тўлов бекор қилиниб, платформани янада оммабоп ва кириш имкони юқори бўлган тизимга айлантириш мақсад қилинган.

Ушбу қарор «Apple» компаниясининг «App Store»даги ишлаб чиқувчи тўловлари ва комиссиялари бўйича босимга дуч келаётган бир даврда эълон қилиниши билан ҳам аҳамиятли. Масалан, «Apple» ҳали ҳам «App Store»да илова жойлаштирувчи дастурчилардан йилига 99 доллар миқдорида тўлов ундиради. «Google» эса «Android» тизимига мўлжалланган «Google Play» дўкони учун бир марталик 25 долларлик тўловни талаб қилади.

Мазкур янгилик «Microsoft»нинг очиқлик ва дастурчилар учун қулайлик сиёсатининг давоми бўлиб, кичик ва мустақил ишлаб чиқувчилар учун янги имкониятлар эшигини очади. Бу орқали компания платформасида жойлашган иловалар сонини кўпайтириш ва экотизимни янада ривожлантиришга эришишни мақсад қилган.