“Microsoft Build 2025” konferensiyasida kompaniya “Windows” operatsion tizimi uchun moʻljallangan “Microsoft Store” doʻkonida ilovalar chop etish uchun endi roʻyxatdan oʻtish toʻlovi olinmasligini eʼlon qildi. Ushbu oʻzgarish 2025-yil iyun oyidan kuchga kiradi va yakka tartibdagi dasturchilar “Microsoft Store”ga bepul aʼzo boʻlib, oʻz ilovalarini joylashtirish imkoniyatiga ega boʻladilar.

Avvalroq “Microsoft” dasturchilardan taxminan 19 AQSH dollari miqdorida roʻyxatdan oʻtish toʻlovi olardi. Endilikda bu toʻlov bekor qilinib, platformani yanada ommabop va kirish imkoni yuqori boʻlgan tizimga aylantirish maqsad qilingan.

Ushbu qaror “Apple” kompaniyasining “App Store”dagi ishlab chiquvchi toʻlovlari va komissiyalari boʻyicha bosimga duch kelayotgan bir davrda eʼlon qilinishi bilan ham ahamiyatli. Masalan, “Apple” hali ham “App Store”da ilova joylashtiruvchi dasturchilardan yiliga 99 dollar miqdorida toʻlov undiradi. “Google” esa “Android” tizimiga moʻljallangan “Google Play” doʻkoni uchun bir martalik 25 dollarlik toʻlovni talab qiladi.

Mazkur yangilik “Microsoft”ning ochiqlik va dasturchilar uchun qulaylik siyosatining davomi boʻlib, kichik va mustaqil ishlab chiquvchilar uchun yangi imkoniyatlar eshigini ochadi. Bu orqali kompaniya platformasida joylashgan ilovalar sonini koʻpaytirish va ekotizimni yanada rivojlantirishga erishishni maqsad qilgan.