Португалия терма жамоаси ва «Ал-Наср» клуби футболчиси Криштиану Роналду ўзини тарихдаги энг яхши ўйинчи эканлигини таъкидлади. Ҳужумчи бу ҳақида «Аtresplayer» нашрига берган интервьюсида гапириб ўтган.

«Мен футбол тарихидаги энг яхши футболчиман. Мухлисларга Месси, Пеле ёки Марадона каби футболчилар ёқиши мумкин ва мен буни тўғри тушунаман ҳамда ҳурмат қиламан. Лекин мен уларга қараганда мукаммалроқман. Бош билан зарба йўллай олиш, жарима зарбаларини голга айлантира олишда менга етадиганини кўрмадим», — дейди Роналду.

Бундан ташқари, у ўз интервьюсида Испаниянинг «Реал Мадрид» клубидаги фаолияти ҳақида ҳам гапириб ўтган.

«Мадридда кўп нарсага эришдим. Мухлислар буни доим хурсанд бўлиб эслашади. 2018 йилда Ювентусга ўтишни хоҳлаганимда Перес мени олиб қолишга ҳаракат қилди. Лекин мен Ювентусга ваъда бериб қўйганим учун қарорни ўзгартиролмасдим» — дейди футболчи.

Роналду қироллик клубининг ҳозирга ўйинчилари ҳақида фикр билдирар экан, жамоа ярим ҳимоячиси Жуд Беллингемни Зинедин Зидан билан қиёслади.

«Беллингем менга Зиданни эслатади. Унинг келажаги ҳам Зиданники каби порлоқ бўлишига ишонаман. Ўғлим Маттео Жуд, Камавинга ва Мбаппега мухлислик қилади», — деб қўшимча қилади у.

Маълумот учун, Криштиану Роналду 5 марта «олтин тўп» соҳиби ҳисобланади. У Португалия терма жамоаси билан 2016 йилги Европа чемпионатида зафар қучган. 2019 йилда ўтказилган УЭФА Миллатлар лигаси кубогини ҳам қўлга киритган.

Эслатиб ўтамиз, Роналду 5 февраль куни 40 ёшни қарши олади. Футболчи айни пайтда Саудия Арабистонининг «Ал-Наср» клубида фаолиятини давом эттирмоқда. Роналду 3 февраль куни ОЧЛ Элит лигаси доирасида бўлиб ўтган «Ал-Наср» ва «Ал-Васл» ўртасидаги баҳсда рақиб дарвозасига иккита тўп киритиб, фаолияти давомида урган голлари сонини 923 тага етказиб олди.