АҚШ президенти Дональд Трамп БМТнинг Нью-Йоркдаги штаб-квартирасига ташрифи чоғида «учта кўнгилсиз воқеа»ни бошдан кечирди. Жумладан, у ва рафиқаси Мелания чиққан эскалатор тўсатдан тўхтаб қолди, нутқ қилаётганда телесуфлёр ишламай қолди, нутқи пайтида залда овоз йўқолиб қолди.

Трамп воқеаларни тергов қилишни талаб қилиб, уларни уч карра саботаж деб атади.

«Кеча Бирлашган Миллатлар Ташкилотида ҳақиқатдан ҳам шармандали воқеа юз берди — бир эмас, иккита эмас, учта жуда кўнгилсиз воқеа!» — деб ёзди у ўзининг «Truth Social» ижтимоий тармоғидаги саҳифасида.

«…Мелания билан юзтубан йиқилишимизга бир бахя қолди. Тутқичларни маҳкам ушлаб олганимиз учунгина, бу фалокат билан якунланмади”, — дейди у.

Трампнинг сўзларига кўра, «бу аниқ саботаж эди». У, шунингдек, БМТ ходимларининг «эскалаторни ўчириш ҳақида ҳазиллашаётганини» эшитган гувоҳлар ҳақида ҳам гапирди.

«Буни қилганлар қамоққа олиниши керак!», — дейди у.

Трамп булар тасодиф эмаслигини айтиб, БМТ Бош Ассамблеясидаги воқеалар ҳақида Бош котиб Антониу Гутерришга мактуб юборишини қўшимча қилди.

Саботаж бўлганми?

БМТ штаб-квартираси Трампнинг саботаж айбловларини рад этди. Бош котиб матбуот котиби Стефан Дюжаррик баёнотида, Трамп ва Меланияни суратга олиш пайти эскалаторда орқага қайтган АҚШ президенти матбуот хизмати оператори ўрнатилган хавфсизлик мосламасини ишга тушириб юборганини тушунтирди.

Бироқ, бу тушунтириш Оқ уй матбуот котиби Керолин Левиттни қаноатлантирмади, у воқеанинг тубига боришга ваъда берди.

«Агар БМТда кимдир эскалаторни президент ва биринчи хоним кўтарилаётганда қасддан тўхтатган бўлса, улар зудлик билан ишдан бўшатилиши ва тергов қилиниши керак», — дейди Левитт. Унинг қўшимча қилишича, президентнинг хавфсизлик гуруҳи воқеани тергов қилмоқда.

БМТ Бош Ассамблеясида яна ким ғалати воқеаларни бошдан кечирди?

Трамп БМТ Бош Ассамблеяси чоғида ноқулай вазиятга тушиб қолган ягона давлат раҳбари эмас эди.

Ижтимоий тармоқларда Франция президенти Эммануэль Макрон ва унинг ҳамроҳлари Трамп кортежи ўтиши учун Франция делегациясининг машинаси тўхтатилганидан кейин пиёда юришга мажбур қилингани акс этган видеолар пайдо бўлди.

Франция раҳбари полициячи билан гаплашиш учун машинадан тушди, бироқ зобит унга давом этишига рухсат бермади ва Макрон АҚШ президентига қўнғироқ қилди.

«Биласизми? Мен кўчада кутяпман, чунки сиз туфайли ҳамма жой ёпиқ»,— деди Макрон телефон орқали Трампга. Бунга АҚШ етакчисининг жавоби қандай бўлганини унинг ўзи билади фақат.

Барибир йўл очилмади ва Макрон БМТ қароргоҳига пиёда боришга мажбур бўлди.

Кўп ўтмай Туркия президенти Режеп Таййип Эрдоғаннинг машинасида ҳам худди шундай ҳолат юз берди. «Ўшанда Туркия президенти Нью-Йорк кўчаларида тирбандликда қолган», — деб хабар беради «Halk TV».