Марказий Осиё давлатлари ва Корея Республикаси парламентлари раҳбарларининг учинчи йиғилишида иштирок этиш учун Ўзбекистонга келган хорижий давлатлар ва Корея Республикаси парламент аъзолари Тошкент шаҳридаги Ислом цивилизацияси марказига ташриф буюрдилар.

Ўзбекистон Республикаси Президенти Шавкат Мирзиёев ташаббуси билан ташкил этилган Ислом цивилизацияси маркази йирик тарихий-маърифий мажмуа бўлиб, унинг фаолияти ислом цивилизациясининг бой илмий ва маънавий меросини асраб-авайлаш, ҳар томонлама ўрганиш ва жаҳон ҳамжамиятига намоён этишга қаратилган.

Меҳмонлар «Исломдан аввалги цивилизациялар», «Биринчи Ренессанс», «Иккинчи Ренессанс» ҳамда «Янги Ўзбекистон — Янги Ренессанс» экспозициялари билан танишди. Парламент аъзоларига Имом Бухорий, Имом Термизий, Абу Мансур Мотуридий, Баҳоуддин Нақшбанд каби буюк мутафаккирларнинг жаҳон илм-фани ривожига қўшган ҳиссаси ҳақида сўзлаб берилди. Шунингдек, Сомонийлар, Қорахонийлар, Хоразмшоҳлар ва Темурийлар каби тарихий даврларга оид ноёб қўлёзмалар, осори-атиқалар ва манбалар намойиш этилди.