Адабиёт — абадиятдир. Фасоҳат гулшанининг булбули бўлиш учун эса тинимсиз меҳнат, мутолаа зарур. Ижодкорлик туйғуларини тарбиялаш учун эса адабий муҳит, маънавий-руҳий баркамоллик муҳим аҳамиятга эга.

Шу маънода, кўҳна маданият маскани бўлган Марғилон шаҳрида халқимизнинг ардоқли шоири Эркин Воҳидов номидаги Ижод мактабининг ташкил этилиши миллат маънавияти йўлидаги эзгу ташаббусларнинг амалдаги яна бир тантанасидир.

Бу ўзбек адабиётининг янги истиқболи – баркамол авлод орзуси йўлидаги изчил саъй-ҳаракатларни рўёбга чиқаришга хизмат қилади. Президентимиз ташаббуси билан Марғилон шаҳрида барпо этилган Ижодкорлар боғи ўз бағрига Ўзбекистон халқ шоири, Ўзбекистон Қаҳрамони Эркин Воҳидов издошларини тарбиялаётган қутлуғ даргоҳ эканлиги билан ҳам бугун халқимизнинг севимли масканларидан бирига айланган.

Севимли шоирнинг тирик сатрлари, қадрдон шеърлари мутолаасидан завққа тўлиб, Ижод мактабига кириб борар экансиз, унинг ижодкорона меъморий қиёфаси, ундаги ёқимли ижодий муҳит гўёки қалбда туғён ураётган туйғуларингизни тарбиялайди.

2017 йилда ташкил этилган она тили ва адабиёт, хорижий тилларга ихтисослаштирилган мактаб-интернатда айни пайтда 134 нафар ўқувчилар тарбияланади. Мактабнинг 11 та ўқув хонаси, 14 ўринли ахборот технологиялари зали, 3000 мингдан ортиқ китобларни жамланган кутубхонадан ёш ижодкорлар тўлиқ баҳраманд бўлмоқда. Шунингдек, 90 ўринли ошхона, 140 ўринли ўқувчилар ётоқхонасида замонавий шароит ва қулайликлар яратилган. Таълим даргоҳининг 63 нафар педагог ва тарбиячилари ўқувчиларнинг барча фанлар, хусусан, она тили ва адабиёт, хорижий тилларни мукаммал ўрганишларига ижодий ёндашадилар. Боиси мактабдаги устозларнинг барчаси ижодкор.

— Мактабимизнинг энг катта ютуғи бўлган адабиётсевар, китобхон ўқувчиларимиз билан фахрланамиз,-дейди муассаса директори Нигора Маннопова. — Ўқувчиларимизнинг ҳар бири иқтидорли, ўз овози ва созига эга. Назм, наср, бадиий публицистика, бадиий таржима йўналишларида тинимсиз изланишлар олиб боришади. Инглиз, рус, турк ва араб тилларида шеърлар ёзаётган, устоз Эркин Воҳидов шеърларини хорижий тилларга таржима қилаётган, мактабимизда ташкил этилган «Ўзбегим» радиоси, «Ўзбегим» журналида илк мухлисларини топаётган, республика ва халқаро ижодий танловларда муносиб эътироф этилаётган ёшларимизни кўриб, бу даргоҳ ёш ижодкорларнинг ижодий юксалишларига мустаҳкам пойдевор яратаётган чинакам адабиёт мактаби эканлиги бизга ғурур бахш этади.    

Таълим муассасасининг Толибжон Рўзибоев, Баҳодир Исо, Ўктамхон Солиева, Мунира Қўқонова, Гулчеҳра Асронова, Муҳаммадамин Нурматов сингари ёшлар қалбидаги ижод чечакларини авайлаб ўстираётган ижодкор устозлари бор. Улар шеъриятда Муаттар Маматкаримова, Гулзода Ўринбоева, насрда Санжар Икромов, Робияхон Кимсанбоева, бадиий таржимада Мубина Маҳмудова, Шарофат Саидбоева, драма йўналишида Аҳрор Тўхтасинов, Шаҳризода Ботирова сингари ўқувчиларининг ижодий парвозларидан тўлқинланиб меҳнат қиладилар.

Мамлакатимиздаги 9 та Ижод мактаби ўртасида ўтказиладиган фан олимпиадалари, кўрик-танлов, адабий анжуман ва мушоираларда Нилуфар Эргашева каби ёш ижодкорлар ҳамиша ғолиб бўлади. «Ғунча ифори», «Қўштепа илҳомлари», «Сиз билган, билмаган Анвар Обиджон», «Бунда булбул китоб ўқийди» каби ўнлаб ёшлар баёзига шеърлари киритилган ёш ижодкор Ватан ҳақида ёниб шеърлар ёзади.

Мактабда ташкил этилган «Олтин девор», «Чашма», «Бадиий таржима», «Дилхирож» каби адабий тўгаракларга Ўзбекистон Ёзувчилар уюшмаси аъзоси бўлган устоз шоирлар раҳбарлик қилади. Истеъдодли ижодкор ўқувчилар Ўзбекистон Ёзувчилар уюшмаси вилоят бўлими қошидаги «Олтин қалам» тўгарагининг ҳам фаол аъзолари саналади.

Ижтимоий тармоқда мактаб-интернатнинг «Эркин Воҳидов Ижод мактаби» номли телеграм ва youtube канали, «Ўзбегим» онлайн журнали фаолият кўрсатади. «Ёш ижодкорларнинг онлайн суҳбати» каналида ҳам ўқувчиларнинг энг сара шеърлари, бадиий таржима ва ҳикоялари бериб борилаётгани ҳам эътиборга лойиқ.

Мирзо Улуғбек номидаги Ўзбекистон Миллий университети, Ўзбекистон Жаҳон тиллари университети, Шарқшунослик университети сингари ўнлаб муқаддас даргоҳлар билан ўрнатилган илмий-ижодий ришталар ҳам катта самара бермоқда.

Яқинда Ижод мактаби ташаббуси билан Алишер Навоий таваллудининг 580 йиллиги ва Заҳириддин Муҳаммад Бобур таваллудининг 538 йиллигига бағишланган «Қўшқанот қасидаси» баёзи чоп этилди. Устоз Эркин Воҳидов шеъри билан бошланадиган баёзда Ижод мактаби ўқитувчилари ижод намуналари, икки буюк даҳо ижодига эҳтиром руҳидаги шеърлар, ғазал ва рубоийларининг хорижий тилларга таржималари кенг ўрин олган.

Ижод мактабида ҳар ўқув йили якунида 2 нафардан энг фаол ва изланувчан ўқувчилар танлаб олиниб, «Эркин Воҳидов» номли стипендия ва замонавий планшет билан тақдирланиши анъанага айланди. Андижон вилоятидаги Муҳаммад Юсуф номидаги Ижод мактаби билан ҳамкорликда ўқувчиларнинг иқтидорини муносиб баҳолаш ва рағбатлантириш мақсадида ўтказилаётган «Парвоз» кўрик-танлови ҳам янги истеъдод эгаларини кашф этишга ҳисса қўшмоқда.

Жилғалар бир куни дарё бўлади, дарёлар ирмоқлардан куч олади. Ижод мактабининг тийрак нигоҳли ўғил-қизлари қалбидаги бир олам орзулар ва унга қанот бахш этаётган қулай шароитларни ҳис этиб, бу қутлуғ даргоҳ Фарғона адабий муҳитини яратишда янги ижодкорлар авлодини тарбиялаётганига чин дилдан ишонгингиз келади.

Ботир Мадиёров,
«Халқ сўзи»