Adabiyot — abadiyatdir. Fasohat gulshanining bulbuli boʻlish uchun esa tinimsiz mehnat, mutolaa zarur. Ijodkorlik tuygʻularini tarbiyalash uchun esa adabiy muhit, maʼnaviy-ruhiy barkamollik muhim ahamiyatga ega.

Shu maʼnoda, koʻhna madaniyat maskani boʻlgan Margʻilon shahrida xalqimizning ardoqli shoiri Erkin Vohidov nomidagi Ijod maktabining tashkil etilishi millat maʼnaviyati yoʻlidagi ezgu tashabbuslarning amaldagi yana bir tantanasidir.

Bu oʻzbek adabiyotining yangi istiqboli – barkamol avlod orzusi yoʻlidagi izchil saʼy-harakatlarni roʻyobga chiqarishga xizmat qiladi. Prezidentimiz tashabbusi bilan Margʻilon shahrida barpo etilgan Ijodkorlar bogʻi oʻz bagʻriga Oʻzbekiston xalq shoiri, Oʻzbekiston Qahramoni Erkin Vohidov izdoshlarini tarbiyalayotgan qutlugʻ dargoh ekanligi bilan ham bugun xalqimizning sevimli maskanlaridan biriga aylangan.

Sevimli shoirning tirik satrlari, qadrdon sheʼrlari mutolaasidan zavqqa toʻlib, Ijod maktabiga kirib borar ekansiz, uning ijodkorona meʼmoriy qiyofasi, undagi yoqimli ijodiy muhit goʻyoki qalbda tugʻyon urayotgan tuygʻularingizni tarbiyalaydi.

2017-yilda tashkil etilgan ona tili va adabiyot, xorijiy tillarga ixtisoslashtirilgan maktab-internatda ayni paytda 134 nafar oʻquvchilar tarbiyalanadi. Maktabning 11 ta oʻquv xonasi, 14 oʻrinli axborot texnologiyalari zali, 3000 mingdan ortiq kitoblarni jamlangan kutubxonadan yosh ijodkorlar toʻliq bahramand boʻlmoqda. Shuningdek, 90 oʻrinli oshxona, 140 oʻrinli oʻquvchilar yotoqxonasida zamonaviy sharoit va qulayliklar yaratilgan. Taʼlim dargohining 63 nafar pedagog va tarbiyachilari oʻquvchilarning barcha fanlar, xususan, ona tili va adabiyot, xorijiy tillarni mukammal oʻrganishlariga ijodiy yondashadilar. Boisi maktabdagi ustozlarning barchasi ijodkor.

— Maktabimizning eng katta yutugʻi boʻlgan adabiyotsevar, kitobxon oʻquvchilarimiz bilan faxrlanamiz,-deydi muassasa direktori Nigora Mannopova. — Oʻquvchilarimizning har biri iqtidorli, oʻz ovozi va soziga ega. Nazm, nasr, badiiy publitsistika, badiiy tarjima yoʻnalishlarida tinimsiz izlanishlar olib borishadi. Ingliz, rus, turk va arab tillarida sheʼrlar yozayotgan, ustoz Erkin Vohidov sheʼrlarini xorijiy tillarga tarjima qilayotgan, maktabimizda tashkil etilgan “Oʻzbegim” radiosi, “Oʻzbegim” jurnalida ilk muxlislarini topayotgan, respublika va xalqaro ijodiy tanlovlarda munosib eʼtirof etilayotgan yoshlarimizni koʻrib, bu dargoh yosh ijodkorlarning ijodiy yuksalishlariga mustahkam poydevor yaratayotgan chinakam adabiyot maktabi ekanligi bizga gʻurur baxsh etadi.

Taʼlim muassasasining Tolibjon Roʻziboyev, Bahodir Iso, Oʻktamxon Soliyeva, Munira Qoʻqonova, Gulchehra Asronova, Muhammadamin Nurmatov singari yoshlar qalbidagi ijod chechaklarini avaylab oʻstirayotgan ijodkor ustozlari bor. Ular sheʼriyatda Muattar Mamatkarimova, Gulzoda Oʻrinboyeva, nasrda Sanjar Ikromov, Robiyaxon Kimsanboyeva, badiiy tarjimada Mubina Mahmudova, Sharofat Saidboyeva, drama yoʻnalishida Ahror Toʻxtasinov, Shahrizoda Botirova singari oʻquvchilarining ijodiy parvozlaridan toʻlqinlanib mehnat qiladilar.

Mamlakatimizdagi 9 ta Ijod maktabi oʻrtasida oʻtkaziladigan fan olimpiadalari, koʻrik-tanlov, adabiy anjuman va mushoiralarda Nilufar Ergasheva kabi yosh ijodkorlar hamisha gʻolib boʻladi. “Gʻuncha ifori”, “Qoʻshtepa ilhomlari”, “Siz bilgan, bilmagan Anvar Obidjon”, “Bunda bulbul kitob oʻqiydi” kabi oʻnlab yoshlar bayoziga sheʼrlari kiritilgan yosh ijodkor Vatan haqida yonib sheʼrlar yozadi.

Maktabda tashkil etilgan “Oltin devor”, “Chashma”, “Badiiy tarjima”, “Dilxiroj” kabi adabiy toʻgaraklarga Oʻzbekiston Yozuvchilar uyushmasi aʼzosi boʻlgan ustoz shoirlar rahbarlik qiladi. Isteʼdodli ijodkor oʻquvchilar Oʻzbekiston Yozuvchilar uyushmasi viloyat boʻlimi qoshidagi “Oltin qalam” toʻgaragining ham faol aʼzolari sanaladi.

Ijtimoiy tarmoqda maktab-internatning “Erkin Vohidov Ijod maktabi” nomli telegram va youtube kanali, “Oʻzbegim” onlayn jurnali faoliyat koʻrsatadi. “Yosh ijodkorlarning onlayn suhbati” kanalida ham oʻquvchilarning eng sara sheʼrlari, badiiy tarjima va hikoyalari berib borilayotgani ham eʼtiborga loyiq.

Mirzo Ulugʻbek nomidagi Oʻzbekiston Milliy universiteti, Oʻzbekiston Jahon tillari universiteti, Sharqshunoslik universiteti singari oʻnlab muqaddas dargohlar bilan oʻrnatilgan ilmiy-ijodiy rishtalar ham katta samara bermoqda.

Yaqinda Ijod maktabi tashabbusi bilan Alisher Navoiy tavalludining 580-yilligi va Zahiriddin Muhammad Bobur tavalludining 538-yilligiga bagʻishlangan “Qoʻshqanot qasidasi” bayozi chop etildi. Ustoz Erkin Vohidov sheʼri bilan boshlanadigan bayozda Ijod maktabi oʻqituvchilari ijod namunalari, ikki buyuk daho ijodiga ehtirom ruhidagi sheʼrlar, gʻazal va ruboiylarining xorijiy tillarga tarjimalari keng oʻrin olgan.

Ijod maktabida har oʻquv yili yakunida 2 nafardan eng faol va izlanuvchan oʻquvchilar tanlab olinib, “Erkin Vohidov” nomli stipendiya va zamonaviy planshet bilan taqdirlanishi anʼanaga aylandi. Andijon viloyatidagi Muhammad Yusuf nomidagi Ijod maktabi bilan hamkorlikda oʻquvchilarning iqtidorini munosib baholash va ragʻbatlantirish maqsadida oʻtkazilayotgan “Parvoz” koʻrik-tanlovi ham yangi isteʼdod egalarini kashf etishga hissa qoʻshmoqda.

Jilgʻalar bir kuni daryo boʻladi, daryolar irmoqlardan kuch oladi. Ijod maktabining tiyrak nigohli oʻgʻil-qizlari qalbidagi bir olam orzular va unga qanot baxsh etayotgan qulay sharoitlarni his etib, bu qutlugʻ dargoh Fargʻona adabiy muhitini yaratishda yangi ijodkorlar avlodini tarbiyalayotganiga chin dildan ishongingiz keladi.

Botir Madiyorov,
“Xalq soʻzi”