Фото: pakhtakor.uz

Футбол билан шуғулланишни «Пахтакор»да бошлаган Шацких профессионал фаолиятини Киевнинг «Динамо» клубида олиб борди. Сермаҳсул ўйинлари билан мухлислар меҳрини қозонган ҳамюртимиз кейинчалик мураббийлик ишини ҳам ушбу жамоада бошлади. 

Дастлаб академия, кейин асосий жамоада фаолият юритди. Шундан сўнг Россиянинг «Ротор» клубида ишлади. Жорий йилнинг июнь ойидан у «Пахтакор»да спорт директори сифатида ишлаб келаётганди. Клуб ва Максим Шацких ўртасида уч йиллик шартнома имзоланган.

«Максим Александрович «Пахтакор» билан кўплаб ғалабаларга эришади деб умид қиламиз. Уч йиллик шартнома муддати ҳам клубимизнинг Шацких билан режалари улканлигини кўрсатади. Жисмоний тайёргарлик мураббийи сифатида украиналик Виталий Шпанюк таклиф этилди. 51 ёшли мутахассис фаолияти давомида Украинанинг «Кремень», «Арсенал», «Славутич», «Карпати», «Лвов», «Ворскла» ва ЛНЗ, Россиянинг «Анжи», «Ротор», Грузиянинг «Динамо» Тбилиси клубларида ишлаган. Шунингдек, уч ярим йил давомида Украина миллий терма жамоасида ишлаган. Ёрдамчи сифатида Вячеслав Беляев ишлайди. У Украинанинг «Таврия», «Металлист», Грузиянинг «Динамо» (Тбилиси) ва Россиянинг «Ротор» клубларида фаолият юритган. Маҳаллий мутахассислардан Денис Иванков (дарвозабонлар мураббийи), Камолиддин Тожиев (ёрдамчи) ва Юрий Сиянов (жисмоний тайёргарлик) Шацкихга ёрдам беришда давом этишади», дейилади клуб матбуот хизмати хабарида.

Маълумот ўрнида айтиб ўтамиз, «Пахтакор»нинг аввалги бош мураббийи Славче Войнески (Шимолий Македония) билан тузилган шартнома шу йилнинг 6 июль куни бекор қилингани маълум бўлган эди. Қайд этилишича, клуб ва мураббий ўртасидаги битим икки томон келишувига кўра бекор қилинган.