Foto: pakhtakor.uz

Futbol bilan shugʻullanishni “Paxtakor”da boshlagan Shaskix professional faoliyatini Kiyevning “Dinamo” klubida olib bordi. Sermahsul oʻyinlari bilan muxlislar mehrini qozongan hamyurtimiz keyinchalik murabbiylik ishini ham ushbu jamoada boshladi. 

Dastlab akademiya, keyin asosiy jamoada faoliyat yuritdi. Shundan soʻng Rossiyaning “Rotor” klubida ishladi. Joriy yilning iyun oyidan u “Paxtakor”da sport direktori sifatida ishlab kelayotgandi. Klub va Maksim Shaskix oʻrtasida uch yillik shartnoma imzolangan.

«Maksim Aleksandrovich “Paxtakor” bilan koʻplab gʻalabalarga erishadi deb umid qilamiz. Uch yillik shartnoma muddati ham klubimizning Shaskix bilan rejalari ulkanligini koʻrsatadi. Jismoniy tayyorgarlik murabbiyi sifatida ukrainalik Vitaliy Shpanyuk taklif etildi. 51 yoshli mutaxassis faoliyati davomida Ukrainaning “Kremen”, “Arsenal”, “Slavutich”, «Karpati», “Lvov”, «Vorskla» va LNZ, Rossiyaning «Anji», “Rotor”, Gruziyaning “Dinamo” Tbilisi klublarida ishlagan. Shuningdek, uch yarim yil davomida Ukraina milliy terma jamoasida ishlagan. Yordamchi sifatida Vyacheslav Belyayev ishlaydi. U Ukrainaning «Tavriya», “Metallist”, Gruziyaning “Dinamo” (Tbilisi) va Rossiyaning “Rotor” klublarida faoliyat yuritgan. Mahalliy mutaxassislardan Denis Ivankov (darvozabonlar murabbiyi), Kamoliddin Tojiyev (yordamchi) va Yuriy Siyanov (jismoniy tayyorgarlik) Shaskixga yordam berishda davom etishadi», deyiladi klub matbuot xizmati xabarida.

Maʼlumot oʻrnida aytib oʻtamiz, “Paxtakor”ning avvalgi bosh murabbiyi Slavche Voyneski (Shimoliy Makedoniya) bilan tuzilgan shartnoma shu yilning 6-iyul kuni bekor qilingani maʼlum boʻlgan edi. Qayd etilishicha, klub va murabbiy oʻrtasidagi bitim ikki tomon kelishuviga koʻra bekor qilingan.