22 январь, чоршанба куни Лос-Анжелес шимолида содир бўлган янги ўрмон ёнғини тезда 38 квадрат километрдан кўпроқ майдонга тарқалди. Бу ҳақда 23 январь куни «Reuters» агентлиги хабар берди.

«Ўт атиги бир неча соат ичида Лос-Анжелеснинг Итон туманини кулга айлантирган даҳшатли ёнғиннинг учдан икки қисми даражасида катталашди», дейилади хабарда.

Кучли шамол ҳамда қуриган ўсимликлар кўплиги сабабли ёнғин жуда тез тарқалмоқда. «31 минг киши хавфсиз жойга кўчирилади, яна 23 минг киши эвакуация қилиниши ҳақида огоҳлантирилди», — деди Лос-Анжелес округ шерифи Роберт Луна.

Калифорния ўрмон хўжалиги ва ёнғиндан ҳимоя қилиш департаменти маълумотларига кўра, қизил байроқли огоҳлантириш натижасида, 1100 га яқин ўт ўчирувчилар жанубий Калифорния бўйлаб сафарбар қилинган.

Ушбу ҳудудда тўққиз ой давомида сезиларли даражада ёмғир ёғмади ва бу ёнғинлар келиб чиқиши учун қулай шароит яратган.

Эслатиб ўтамиз, Лос-Анжелес тарихида энг талафотли дейилган аввалроқ юз берган ёнғинлар оқибатида 24 киши ҳалок бўлган ҳамда 16 киши бедарак йўқолган эди. Офат натижасида ҳудудга 250-275 миллиард АҚШ доллари атрофида зарар етган.