Иллюстратив сурат

Коронавирус инфекцияси тарқалиш суръати тобора кенгайиб бормоқда. Сўнгги маълумотларга кўра, дунёда ушбу инфекцияни юқтирганлар сони 1,5 миллион нафардан ортди. Ушбу касалликдан ҳаётдан кўз юмганлар эса 90 мингга қараб кетяпти.

Аммо ушбу касалликка қарши ҳали бирон бир самарали дори воситаси ва даво усули ҳозирча топилмади. Шу боис кўпчиликда умидсизлик, стресс юқори. Табиийки, ана шундай вазиятда кўпчиликда ўзини инфекциядан ҳимоя қилиш истаги пайдо бўлади.

Эътиборли бўлинг, ижтимоий тармоқлар, турли сайтларда тавсия сифатида келтирилаётган ҳамма профилактик чораларни ҳам самарали деб бўлмайди.

Масалан, кейинги пайтларда лимоннинг коронавирус инфекциясига қарши курашда фойдали жиҳатлари ҳақида жуда кўп маълумотлар тарқатилмоқда. Бундай муждалар ортидан ушбу маҳсулотнинг нархи кескин ошиб кетди. Олдинроқ саримсоқ пиёз ҳақида ҳам шундай маълумотлар тарқатилган эди.

Албатта, цитрус мевалари организм учун фойдали бўлган C витамини ёки аскорбин кислотанинг манбаи ҳисобланади. Аммо бу лимон коронавирус инфекциясидан ҳимоя қилишига кафолат дегани эмас.

Ушбу масала юзасидан Жаҳон соғлиқни сақлаш ташкилоти (ЖССТ) ўз муносабатини билдирди. Батафсил маълумотлар муассасанинг расмий веб-сайтида эълон қилинди.

ЖССТ томонидан изоҳланишича, ҳозирги пайтда олимлар лимоннинг COVID-19га қарши профилактика сифатида фойдалари ҳақида далилларни тақдим этишмаган.

Бироқ, ташкилот вакиллари цитрус меваларини, шунингдек, ҳар қандай сабзавот ва меваларни етарли миқдорда истеъмол қилишни тавсия этадилар. Бу соғлом овқатланиш шартларидан биридир.

Шунингдек, ЖССТ мутахассислари лимон истеъмол қилиб, инсон ўзини яхши ҳис қилса, бу пандемиядан ҳимояланишга ўзига бўлган ишончни ошириши мумкин, дея ҳисоблашмоқда.