Архив сурат

Япония шимоли-шарқидаги Тохоку линиясида зилзила туфайли тезюрар «Синькансен» поезди рельсдан чиқиб кетган. Бу ҳақда NHK телеканали хабар бермоқда.

Поезд Фукусима ва Сироисидзао шаҳарлари ўртасидаги йўналишда рельсдан чиқиб кетган. Бунинг оқибатида вагонларнинг бир қисми эгилиб қолган. Ҳодиса юз берган вақтда поездда 100 нафарга яқин одам бўлган. Улар эвакуация қилинган. Жабрланганлар ҳақида маълумот йўқ.

Аввал хабар берганимиздек, бугун маҳаллий вақт билан 23:36да Япония шимоли-шарқида Тинч океанида Фукусима префектураси яқинида 7,3 магнитудали зилзила содир бўлди. Унинг ўчоғи 60 километр чуқурликда қайд этилган. Ер силкинишидан сўнг цунами хавфи эълон қилинган. Зилзила таъсири мамлакатнинг шимоли-шарқидаги ва шимолидаги префектуралари, шу жумладан, пойтахт Токиода ҳам кучли тўлқинли силкинишлар сезилган. 

Кейинроқ, зилзиладан сўнг Японияда 2 миллиондан ортиқ уй электр таъминотида узилгани, «Фукусима-1» ва «Фукусима-2» АЭСнинг оператори TEPCO кучли зилзиладан кейин объектларга етиши мумкин бўлган зарарни ўрганаётгани ҳақида хабар берган эдик.

Қурбонлар ва вайронагарчиликлар ҳақида маълумот йўқ.