Associated Press (AP) хабарига кўра, АҚШ Ички хавфсизлик вазирлиги ходими Эдвин Лопес Венесуэла президенти Николас Мадуронинг бош учувчиси — генерал Битнер Виллегасни ёллаб, уни президентни ҳибсга олиш мумкин бўлган жойга олиб боришга ундамоқчи бўлган.

Режа 2024 йил апрель ойида ишлаб чиқилган. Ўша пайтда Лопес Доминикана Республикасидаги АҚШ элчихонасида атташе лавозимида ишлаган. Унга Мадурога тегишли деб тахмин қилинган Dassault Falcon 2000EX ва Dassault Falcon 900EX самолётлари Санто-Доминго аэропортида таъмирда тургани ҳақида маълумот берилган. Самолётларни беш учувчи, жумладан, бош учувчи генерал Виллегас ҳам кузатиб борган.

АҚШ агентлари учувчиларни сўроқ қилиб, уларнинг Мадуро билан алоқаларидан бехабарлигини билишган. Энг сўнггида улар Виллегас билан суҳбатлашишган. Суҳбат якунида Лопес учувчига катта мукофот эвазига Мадурони ҳибсга олиш мумкин бўлган жойга етказиб беришни таклиф қилган. Виллегас бу таклифга аниқ жавоб бермаган, аммо ўз телефон рақамини қолдирган. Агентлар буни ижобий ишора деб баҳолаган. Учувчиларга Венесуэлага қайтишга рухсат берилган, самолётлар эса мусодара қилинган.

Кейинги 16 ой давомида Лопес Виллегас билан ёзишиб, уни Мадурони «топширишга» кўндиришга ҳаракат қилган, ҳатто 2025 йил июлда нафақага чиққанидан кейин ҳам ёзишувни давом эттирган.
Август ойида у учувчига Мадурони қўлга олишга ёрдам берганлар учун АҚШ мукофотни 50 миллион долларга оширганини айтган. Шу пайтдан сўнг Виллегас ёзишувларга жавоб беришни тўхтатган.

Режа барбод бўлганини тушунган агентлар ва уларнинг шериклари Венесуэла президентини руҳий босим остига олишга уринишган. 2025 йил сентябрь ўрталарида Дональд Трампнинг биринчи маъмурияти собиқ аъзоси Маршал Биллингсли (Венесуэла мухолифати билан алоқаси бўлган шахс) ижтимоий тармоқларда Виллегасни туғилган куни билан табриклаб, Доминиканада Лопес билан учрашув чоғида олинган суратни жойлаштирган (унда Лопеснинг қисми кесиб ташланган).

AP маълумотига кўра, бу пост Мадуронинг самолёти Каракасдан ҳавога кўтарилишидан бир дақиқа олдин эълон қилинган. 20 дақиқадан сўнг самолёт аэропортга қайтган. Биллингслининг пости Венесуэла ижтимоий тармоқларида катта шов-шувга сабаб бўлган: мухолифат вакиллари учувчини «сўроқ учун қайтаришганини» тахмин қилган, бошқалар эса унинг қамоққа олиниши мумкинлигини айтишган.

Бир неча кун давомида Виллегасдан ҳеч қандай хабар бўлмаган, бироқ 24 сентябрь куни у телекўрсатувда пайдо бўлиб, унда Венесуэла учувчиларининг садоқати ва ҳалоллиги ҳақида сўз юритилган.