Фото: Reuters

Венгрия Бош вазири Виктор Орбан Пекинда Хитой раҳбари Си Цзиньпин билан учрашди.

Орбан ўз ташрифини «Тинчлик миссияси 3.0» деб таърифлаб, Хитойнинг Россия ва Украина ўртасида тинчликни ўрнатишдаги потенциал ролини таъкидлади. Бу ҳақда «Deutsche Welle» нашри хабар бермоқда.

Европалик сиёсатчининг таъкидлашича, Пекиннинг таъсири тинчлик йўлида шароит яратиш учун ҳал қилувчи аҳамиятга эга.

Учрашувда ХХР раиси Европа Иттифоқи кучларини Россия ва Украина ўртасида тўғридан-тўғри тинчлик музокараларини қайта тиклашни қўллаб-қувватлашга чақирди.

Хитой давлат телерадиокомпанияси CCTV маълумотларига кўра, Си Цзиньпин халқаро ҳамжамият икки томон ўртасидаги мулоқот ва музокараларга ёрдам бериши кераклигини айтган. У йирик давлатлар ўт очишни тўхтатишга эришишга ижобий ҳисса қўшиши зарурлигини таъкидлади.

Хитой, айниқса, Украинадаги можаро бошланганидан бери Россия билан стратегик ҳамкорликни сақлаб келмоқда. Чин диёри ўзини нейтрал, деб кўрсатишига қарамай, савдо ҳажмини ошириш орқали Россия иқтисодиётини қўллаб-қувватлади. Халқаро изоляцияга дуч келган Россия учун бу ҳамкорлик жуда муҳим эди. Шу сабабли ҳам Европа Иттифоқи Пекиннинг Москвага сўзи ўтишига ишонишмоқда.

Орбаннинг Пекинга ташрифи унинг ўтган ҳафта Россия ва Украинага қилган кутилмаган саёҳатларидан кейин содир бўлди. Россияда у президент Владимир Путин билан учрашиб, давом этаётган можарони муҳокама қилган. Унинг хатти-ҳаракатлари Киев ва Европа Иттифоқи томонидан танқидга учради. Орбаннинг позицияси Европа Иттифоқининг уруш бўйича позициясига путур етказиши мумкинлигидан хавотирда.

Венгрия июль ойи бошидан Европа Иттифоқига раислик қилишни бошлади. Орбаннинг тинчлик миссияси унинг Москвага энг хайрихоҳ Европа Иттифоқи раҳбари сифатидаги ўзига хос позициясини кўрсатиб беради.

Аввалроқ, Венгрия Бош вазири Виктор Орбан ва Россия Федерацияси президенти Владимир Путин Москвада учрашганди.