Балиқчи туманида фаолиятини бошлаган “Оила ва хотин-қизлар маскани” ҳудуддаги хотин-қизлар фаоллигини ошириш, уларни қўллаб-қувватлашга хизмат қилади. Унда касб-ҳунарга ўқитиш, тадбиркорликка кўмаклашиш, соғлом турмуш тарзига йўналтирувчи машғулотлар ўтказилади. Ёшларни турмушга тайёрлаш бўйича махсус курслар, болалар учун алоҳида хоналар ҳам мавжуд.

— Масканда “Бувижонлар мактаби”, “Оқила аёллар” жамоатчилик кенгаши, фитнес ва рақс хоналари, психолог, юрист хизмати, тиббиёт хоналари, ёшлар учун турмуш дарслари каби фаолиятлар йўлга қўйилган, — дейди Чинобод шаҳарчасида истиқомат қилувчи Гулнорахон Аҳмедова. — Аёллар бу ерда ўзига ишонишни ўрганяпти, янги касб, янги ҳаёт учун куч оляпти. Шахсан ўзим психолог кўмагида руҳиятни бошқариш орқали ўзига бўлган ишончни ошириш бўйича тавсия олмоқдаман. Бунинг натижасида меҳнат фаолиятимдаги янги босқичга қадам қўйишни режалаштирганман.

Бундай масканлар хотин-қизлар учун нафақат билим ва кўникма манбаи, балки маслаҳат, кўмак ва руҳий мадад олиш жойи сифатида ҳам белгиланган. Маҳаллада аёлнинг мақоми мустаҳкамланса, оила мустаҳкам бўлади, деган ғоя ушбу марказ фаолиятида ўз ифодасини топмоқда.

Саминжон ҲУСАНОВ

«Халқ сўзи»