Baliqchi tumanida faoliyatini boshlagan “Oila va xotin-qizlar maskani” hududdagi xotin-qizlar faolligini oshirish, ularni qoʻllab-quvvatlashga xizmat qiladi. Unda kasb-hunarga oʻqitish, tadbirkorlikka koʻmaklashish, sogʻlom turmush tarziga yoʻnaltiruvchi mashgʻulotlar oʻtkaziladi. Yoshlarni turmushga tayyorlash boʻyicha maxsus kurslar, bolalar uchun alohida xonalar ham mavjud.

— Maskanda “Buvijonlar maktabi”, “Oqila ayollar” jamoatchilik kengashi, fitnes va raqs xonalari, psixolog, yurist xizmati, tibbiyot xonalari, yoshlar uchun turmush darslari kabi faoliyatlar yoʻlga qoʻyilgan, — deydi Chinobod shaharchasida istiqomat qiluvchi Gulnoraxon Ahmedova. — Ayollar bu yerda oʻziga ishonishni oʻrganyapti, yangi kasb, yangi hayot uchun kuch olyapti. Shaxsan oʻzim psixolog koʻmagida ruhiyatni boshqarish orqali oʻziga boʻlgan ishonchni oshirish boʻyicha tavsiya olmoqdaman. Buning natijasida mehnat faoliyatimdagi yangi bosqichga qadam qoʻyishni rejalashtirganman.

Bunday maskanlar xotin-qizlar uchun nafaqat bilim va koʻnikma manbai, balki maslahat, koʻmak va ruhiy madad olish joyi sifatida ham belgilangan. Mahallada ayolning maqomi mustahkamlansa, oila mustahkam boʻladi, degan gʻoya ushbu markaz faoliyatida oʻz ifodasini topmoqda.

Saminjon HUSANOV

“Xalq soʻzi”