Фото: Халқ сўзи

Хоразм вилоятида ўзбек футболининг 110 йиллик юбилейига соҳа фахрийлари ва мухлислари билан учрашувлар, матбуот анжумани ва ушбу спорт тури бўйича мусобақалар ўтказилди. Учрашувларда бугунги кунда дунёда энг оммавий спорт турига айланган, «миллионлар ўйини» деб таърифланадиган футболнинг ривожланиш тарихи, соғлом турмуш тарзини шакллантириш, мамлакат салоҳиятини халқаро майдонда тарғиб этишдаги аҳамияти эътироф этилди.

Футбол ихлосмандлари ўзбек футболи ривожига катта ҳисса қўшган хоразмлик футболчилар, Ўзбекистон чемпионатларида фаол қатнашган «Наримоновчи», «Хонқа», «Динамо», «Турбина», «Спартак» каби футбол жамоалари номини эсга олдилар.

— Президентимизнинг 2019 йил 4 декабрдаги «Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида» ги Фармони ўзбек футболи тарихида янги саҳифа очди, — дейди Хоразм вилоят футбол ассоциацияси 1-вице президенти Ислом Абдушарипов. — Вилоятимизда ҳам футбол инфратузилмасини замон талаблари даражасига кўтариш ва футбол клубларини моддий қўллаб-қувватлаш ишлари жадал суръат касб этмоқда. Хусусан, Урганч шаҳридаги «Хоразм» спорт мажмуаси реконструкция қилинди, футбол академияси ўз фаолиятини бошлади.

Бугунги кунда вилоятда иқтидорли ёш футболчиларни танлаш, футбол инфратузилмасини ривожлантириш, футбол бўйича спорт мактаблари фаолиятини янги босқичга кўтариш, соҳа мутахассисларини тайёрлаш ва уларни моддий рағбатлантириш, ўтказилаётган мусобақалар қамрови ва савиясини ошириш масалалари маҳаллий ҳокимликларнинг доимий эътиборида турибди.

«Ҳоким кубоги», «Беш муҳим ташаббус», сектор раҳбарлари кубоги учун футбол мусобақалари йил давомида ўтказилиб, унда вилоятнинг барча ҳудудларидан 7 ёшдан 18 ёшгача бўлган ўқувчи-ёшлар тўла қамраб олинди. Вилоятдаги барча умумтаълим мактабларида давлат-хусусий шериклик асосида сунъий қопламали стадионлар ташкил қилинди. Давлат таълим муассасалари футбол учун зарур бўлган спорт инвентарлари билан таъминланди. Ана шундай шароитларда тарбияланаётган ёшлар орасидан келгусида ўзбек футболининг ёрқин юлдузлари етишиб чиқажак, албатта.

Тадбирда вилоятда футболни ривожлантиришга қўшган муносиб ҳиссаси учун Хоразм вилояти ҳокими Фарход Эрманов «Ўзбекистон футболи ривожига қўшган ҳиссаси учун» кўкрак нишони билан тақдирланди. Футбол байрами концерт дастури ва Coca-Cola кубоги 2 туридан ўрин олган «Хоразм» – «АГМК» баҳси билан давом этди.

Одилбек Одамбоев, «Халқ сўзи».