Хитой ва Россия сиёсати бўйича мутахассис, «Озодликка қарши фронт» китобининг муаллифи Адриан Гайгеснинг фикрича, Путин ва Си Цзиньпин диктаторлар томонидан бошқариладиган янги дунё тартиботини яратмоқчи. Бу ҳақида «Bild» нашри хабар берди.

Экспертнинг фикрича, Владимир Путин ва Си Цзиньпин учрашган ШҲТ саммити Москва ва Пекин ўртасидаги ҳамкорликни мустаҳкамлашнинг яна бир босқичидир.

«Бу икки сиёсатчининг умумий мақсади бор, яъни уларнинг диктаторлик тизимлари томонидан бошқариладиган янги дунёни яратиш. Улар сўнгги ойларда бу йўналишда нималар содир бўлгани ва қандай давом этиш кераклиги ҳақида фикр алмашадилар», — деб тушунтиради Гайгес «Bild»га берган интервьюсида.

Экспертнинг қўшимча қилишича, Путин хитойлик ҳамкасбига Аляскада Трамп билан учрашув ҳақида гапириб беради. Бу Си Цзиньпин учун қизиқиш уйғотади, чунки у ҳам бир кун келиб Трамп билан учрашади ва худди шу тактикани қўллайди. Яъни, Трампга хушомад қилади ва АҚШдан катта имтиёзлар олади.

ШҲТ саммитидаги иккинчи асосий масала Украинадаги уруш бўлди. Бироқ Гайгес Хитойнинг Россияга қурол-яроғ етказиб беришига ишонмайди. Чунки бу Пекиннинг бетарафлик позициясига зид ҳисобланади.

Шунга қарамай, Путин ва Си Цзиньпин Россия ресурсларини Хитойга етказиб беришни муҳокама қилмоқдалар. Бунинг эвазига Хитой технологиялари Россияга жўнатилади. Бундан ташқари, Гайгеснинг фикрича, Кремль Хитойга Украинада уруш қандай кетаётгани ҳақида аниқ маълумот бериб боради, чунки Хитой Тайванга бостириб кириши учун баъзи тажрибаларни орттириши керак.