Пекинда иккинчи жаҳон уруши тугаганининг 80 йиллиги муносабати билан катта ҳарбий парад бўлиб ўтди. Си Цзиньпин 24 та давлат раҳбарларини, жумладан, Владимир Путин ва Ким Чен Инни таклиф қилди.

«Хитойликлар зўравонликдан қўрқмайдиган, мустақил ва кучли халқдир. Бугунги кунда инсоният тинчлик ёки уруш, диалог ёки қарама-қаршилик танловига дуч келмоқда», — дейди ХХР Раиси.

Ўн минглаб аскарлар Тиананмен майдонида саф тортар экан, хитойликлар АҚШгача етиб бора оладиган замонавий гипертовушли ракеталарни, ҳаво ҳужумидан мудофаа ракеталарини, учувчисиз учиш қурилмаларини, танкларни, самолётларни ҳамда қитъалараро баллистик ракеталарни намойиш этди.

«Парад Хитой катта кучларга қарши туришга ва ҳарбий қарама — қаршиликка тайёрлигини кўрсатди», — дейди SPEAR хавфсизлик, сиёсат ва иқтисодиёт институти директори Май-Бритт Штумбаум.

Хитой бўйича мутахассис Адриан Гайгеснинг қўшимча қилишича, Си Цзиньпин ўзини кўплаб мамлакатларда ҳурматга сазовор бўлган янги халқаро куч етакчиси сифатида кўрсатмоқда. Гайгеснинг сўзларига кўра, Си Цзиньпин, Путин ва Ким Чен Иннинг биргаликда парадда кўриниш бериши юқори рамзий маънога эга. Мутахассис буни эркинликка қарши бирлашган фронт сифатида таърифлаяпти.

«Бу Хитой, Россия ва Шимолий Кореянинг яқин ҳарбий алоқасини англатади. Ким Чен Ин минглаб аскарларини Украинага қарши жанг қилиш учун юборади, Си Цзиньпин эса икки томонлама ўйин ўйнайди. Ғарбда у тинчликпарвар сифатида кўринишга ҳаракат қилади, лекин тобора кўпроқ рус газини сотиб олади ва шу билан урушни молиялаштиради», — дейди эксперт.