Ўзбекистоннинг Малайзиядаги элчиси Равшан Усманов Куала-Лумпур шаҳрида бўлиб ўтган Халқаро ментал арифметика мусобақасида муваффақиятли иштирок этган ўзбекистонлик ўқувчилар билан учрашди.

Мазкур халқаро танловда дунёнинг 40 мамлакатидан саралаш босқичи натижаси ўлароқ, 15 мамлакатдан 5 ёшдан 13 ёшгача бўлган “ALOHA Mental Arithmetic” математика мактабларининг 700 нафардан ортиқ ўқувчилари иштирок этишди.

Ўзбекистонлик 33 нафар ўқувчи Индонезия, Канада, Мексика, Хитой, Хорватия, Эквадор, Ҳиндистондан келган болалар билан математика бўйича ўзаро куч синашиб, мамлакатимиз шарафини муносиб  ҳимоя қилди.

Мусобақа иштирокчиларидан турли мураккаблик даражасидаги математика ҳисоб-китобларини юқори тезликда амалга ошириш талаб этилди.  Натижада Ўзбекистоннинг барча вакиллари совринли ўринларга сазовор бўлишди. Хусусан, 14 нафар ўқувчимиз “Grand Champion”, 6 нафари “Champion” кубогини қўлга  киритди. Мамлакатимиз вакиллари ҳаммаси бўлиб  6 та олтин, 3 та кумуш, 4 та бронза медалини қўлга киритишди.