Oʻzbekistonning Malayziyadagi elchisi Ravshan Usmanov Kuala-Lumpur shahrida boʻlib oʻtgan Xalqaro mental arifmetika musobaqasida muvaffaqiyatli ishtirok etgan oʻzbekistonlik oʻquvchilar bilan uchrashdi.

Mazkur xalqaro tanlovda dunyoning 40 mamlakatidan saralash bosqichi natijasi oʻlaroq, 15 mamlakatdan 5 yoshdan 13 yoshgacha boʻlgan “ALOHA Mental Arithmetic” matematika maktablarining 700 nafardan ortiq oʻquvchilari ishtirok etishdi.

Oʻzbekistonlik 33 nafar oʻquvchi Indoneziya, Kanada, Meksika, Xitoy, Xorvatiya, Ekvador, Hindistondan kelgan bolalar bilan matematika boʻyicha oʻzaro kuch sinashib, mamlakatimiz sharafini munosib  himoya qildi.

Musobaqa ishtirokchilaridan turli murakkablik darajasidagi matematika hisob-kitoblarini yuqori tezlikda amalga oshirish talab etildi.  Natijada Oʻzbekistonning barcha vakillari sovrinli oʻrinlarga sazovor boʻlishdi. Xususan, 14 nafar oʻquvchimiz “Grand Champion”, 6 nafari “Champion” kubogini qoʻlga  kiritdi. Mamlakatimiz vakillari hammasi boʻlib  6 ta oltin, 3 ta kumush, 4 ta bronza medalini qoʻlga kiritishdi.