Исроилнинг Қатарга ҳужумидан сўнг Анқара Тел-Авивнинг минтақавий амбициялари юзасидан тобора кўпроқ ҳушёрликка ўтмоқда. Бу ҳақида «Al Jazeera» нашри хабар берди.

Хабарда айтилишича, Исроил ҳукуматининг Қатарга зарбасидан сўнг исроиллик шарҳловчилар эътиборини тезда Туркияга қаратган. Бу ҳолат Анқарани сиёсий ҳушёр бўлишга мажбур қилган.

«American Enterprise Institute» катта илмий ходими Майкл Рубиннинг таъкидлашича, Туркия Исроилнинг навбатдаги нишони бўлиши мумкин. Бироқ шундай бўлган тақдирда ҳам мамлакат ўзини ҳимоя қилиш учун НАТО аъзолигига таянмаслиги керак.

Ижтимоий тармоқларда исроиллик академик ва сиёсий арбоб Майер Масрининг Исроил Қатарга йўллаган зарбасидан сўнг билдирган фикри кўплаб муҳокамаларга сабаб бўлмоқда. У ўзининг «Х» тармоғидаги саҳифасида «Бугун Қатар, эртага Туркия», деб ёзганди.

Майер Масрининг ушбу сўзларига Туркия президенти Ражаб Тоййиб Эрдўғоннинг катта маслаҳатчиси кескин жавоб қайтарган.

Унинг «Номингиз харитадан ўчирилиши билан дунё тинчликка эришади», деб айтган гаплари исроиллик экспертлар томонидан таҳдид сифатида қабул қилинган.

Мазкур ҳолат фонида Исроилни қўллаб-қувватловчи оммавий ахборот воситалари Туркияни «Исроилнинг энг хавфли душмани» сифатида кўрсатишга уринмоқда.

Унга кўра, исроиллик шарҳловчилар Туркиянинг Шарқий Ўртаер денгизидаги мавжудлигини «таҳдид» ва урушдан кейинги Сурияни қайта қуришдаги ролини «янги кучайиб бораётган хавф» сифатида баҳолаган.

«Анқарада Исроилнинг ҳаракатлари жиддий қабул қилинмоқда. Исроил минтақавий гегемонликка интиляпти. Туркия Исроил тажовузининг чегараси йўқлигини тобора кўпроқ ҳис қилмоқда», — дейди Атлантика Кенгашининг норезиденти бўлган Омер Ўзкизилжик.

Туркиядаги Глобал ва минтақавий тадқиқотлар маркази директори Гўкҳан Cинкара ҳозирча Исроил ва Туркия ўртасидаги кескинлик назорат остида эканини билдирган.