Саминжон ҲУСАНОВ/«Халқ сўзи». Улуғнор туманида яшовчи М.А. оиласидан ажрашганлиги туфайли суд қарорига асосан икки нафар фарзанди учун алимент тўлаши керак эди. Ушбу амал унинг иш ҳақига қаратилгани сабабли меҳнат қилаётган жамоаси раҳбарининг ҳам зиммасига жавобгарлик белгиланган. Яъни, у ишчи учун тўланаётган иш ҳақида алимент тўловини ажратиб бериши керак эди. Афсуски, амалда бундай бўлмади... Шундан сўнг раҳбар М.Т.га мавзуга доир талабнома юборилди. Афсуски, вазият ўзгармади...

– Натижада фермер хўжалиги раҳбари М.Т.га нисбатан жарима жазоси тайинланди, – дейди МИБ Улуғнор туман бўлими ходими Шерзодбек Мамуталиев. – Шунингдек, ижро ҳаракатлари давомида унга тегишли «Дамас» автомашинаси хатланиши жараёнида жарима пули ундирилди. Раҳбар бундан кейин ишчининг ҳар ойлик маошидан болалари учун алимент тўловини ўз вақтида тўлатилишини назорат қиладиган бўлди.

«Ота бўлиш осон, оталик қилиш қийин», дейди доно халқимиз. Қолаверса, «Қўлдан берганга қуш тўймас» деган нақл ҳам бор. Модомики, шундай экан, алиментчи оталар фарзанди учун тўланиши керак бўлган маблағни ўз вақтида ажратиши инсоний бурчидир.