Халқаро олимлар гуруҳи 2022 йилдан буён экстремал иқлим ҳодисалари оқибатида бутун дунё бўйлаб озиқ-овқат нархларининг кескин ошганига гувоҳ бўлишди. Бу ҳақида «Al Jazeera» нашрида маълумот берилди.

Олимлар экстремал иқлим ҳодисаларининг дунё бўйлаб озиқ-овқат нархларига таъсирини ўрганган тадқиқот хулосаларини эълон қилди. Мазкур тадқиқотда экстремал иқлим ҳодисалари туфайли дунё бўйлаб гуруч, маккажўхори, какао, қаҳва, картошка ва бошқа озиқ-овқат маҳсулотлари нархининг ошиши билан боғлиқ ҳолатлар кузатилган.

21 июль куни эълон қилинган тадқиқотда Гана ва Кот-д'Ивуардаги жазирама тўлқинидан кейин 2024 йил апрель ойида жаҳон бўйлаб какао нархининг 280 фоизга кўтарилгани қайд этилган. Шунингдек, 2022 йилдаги сув тошқинларидан сўнг Австралияда марул нархининг 300 фоизга ошганлиги кузатилган.

Билдирилишича, аксарият ҳолларда дунё бўйлаб нархларнинг кўтарилиши жазирама иссиқдан кейин содир бўлган. Масалан, 2024 йил сентябрида Жанубий Кореяда карам нархининг 70 фоизга, Японияда гуруч нархининг 48 фоизга, Ҳиндистонда картошка нархининг 81 фоизга ошишига ҳаво ҳароратининг кескин кўтарилиши сабаб бўлган.

Бундан ташқари, нархларнинг ўсиши қурғоқчилик билан ҳам боғлиқ бўлган. Бразилияда 2023 йилги қурғоқчилик, кейинги йилда жаҳон кофе нархларининг 55 фоизга ошишига олиб келган. Эфиопиядаги қурғоқчилик сабабли мамлакатдаги жами озиқ-овқат нархлари 40 фоизгача кўтарилган.

Бирлашган Миллатлар Ташкилотининг Иқлим ўзгариши бўйича доиравий конвенциясига мувофиқ, 2019 йилдан 2030 йилгача иқлим инқирозини келтириб чиқарадиган глобал чиқиндиларни 2,6 фоизга қисқартириш барча ҳукуматлар олдидаги асосий вазифа сифатида белгиланган.