Фото: AP

«Тесла» компанияси раҳбари Илон Маск АҚШнинг Хитой электр транспорт воситаларига қўйилаётган божларига қарши эканини билдирди.

У бу фикрларини президент Жо Байден Хитойдан олиб келинган электромобиллар учун йиғимларни тўрт баравар оширганидан кейин айтиб ўтди.

«На Тесла, на мен бу тарифларни хоҳлагандик», — деди миллиардер Париждаги технологик анжуманда.

Ўтган ҳафта Оқ уй янги чоралар, жумладан, Хитойдан олиб келинадиган автомобилларга 100 фоизлик тариф қўйиш адолатсиз сиёсатга жавоб эканлиги ва АҚШда иш жойларини ҳимоя қилиш мақсад қилинганини билдирганди.

«Айирбошлаш эркинлигига тўсқинлик қиладиган ёки бозорни бузадиган қарорлар яхши эмас. «Тесла» Хитой бозорида тарифларсиз ва имтиёзли ёрдамсиз жуда яхши рақобатлаша олади. Мен тарифлар бўлмаслиги тарафдориман», — дейди Илон Маск.

Жо Байден ўзидан олдинги президент Доналд Трамп томонидан Хитойга нисбатан жорий қилинган бир қатор тарифларни сақлаб қолиб, Пекинга савдо босимини оширди. Ўтган ҳафта у Хитойнинг электр транспорт воситалари ва бошқа асосий товарлар, жумладан, батареялар, компьютер чиплари ва асосий тиббий буюмлар учун бозорда адолат ўрнатишга ваъда берди.

Ўз навбатида, Хитой тарифларни оширишга қарши эканлиги ва жавоб чораларини кўришини маълум қилган.

Ушбу ҳафта Хитой АҚШ, Европа Иттифоқи, Тайван ва Япониядан келадиган пластмасса импортига қарши антидемпинг текширувини бошлади. Шунингдек, Пекин Европа Иттифоқи ва АҚШдан олиб келинган катта двигателли автомобилларга 25 фоизгача бож тўланиши мумкинлигини қўшимча қилди.

Европа Иттифоқининг савдо сиёсатини назорат қилувчи Европа Комиссияси Хитойда ишлаб чиқарилган электр автомобиллари импортига қарши чоралар қўллаш тўғрисида 4 июлгача қарор қабул қилиши кутилмоқда.