Шўрчи туманидаги “Лайлакхона” маҳалласида яшовчи Жанғил Умаралиева 1-гуруҳ ногирони бўлишига қарамай, ҳаётга бўлган умидини йўқотмаган. У 30 йилдан ортиқ маҳалладаги 7-умумтаълим мактабида ўқитувчилик қилди, 20 йилдан буён эса ногиронлик аравачасида.

Матонатли аёл уйида болаларга адабиёт ва математика фанидан бепул сабоқ бериб, уларни билим олишга, фанларга қизиқтиришга катта ҳисса қўшмоқда.

— Ҳаётимдан нолимайман, ҳар куним мазмунли ўтмоқда, — дейди Ж.Умаралиева. — Давлатимиз бераётган нафақа пули эҳтиёжим учун етарли. Менинг орзум ёшларимиз билимли бўлиб, камолотга етиши ва юртимизга фойдали шахслар бўлишидир. Улар эришган муваффақиятлар менга куч бағишлайди.

Маҳалладаги ёшлар ҳам Жанғил холанинг фидокорона меҳнатини қадрлайди.

— Устозимиз туфайли математикани яхши ўзлаштиряпман. Ҳар куни машғулотга келаман. Бепул дарс беради, бу биз учун катта ёрдам. Келажакда ҳисобчи бўлишни ният қилганман, — дейди Севинч Ўролова.

Бугунги кунда мамлакатимизда ҳар бир фуқаронинг имконияти кенгайтирилиши, жамиятдаги ҳар бир аъзонинг фаоллиги оширилиши давлат сиёсатида устувор аҳамият касб этмоқда. Жанғил Умаралиева каби инсонлар эса ана шу ғояларни амалга оширишда фидокорлик ва матонат билан меҳнат қилмоқда.

Фарҳод ЭСОНОВ,

«Халқ сўзи».