АҚШ Венесуэла атрофидаги босимни янада кучайтирмоқда. Сўнгги пайтларда асосий эътибор нефть танкерларини ушлаб қолишга қаратилган бўлса-да, Оқ уй қуруқликда ҳарбий операция ўтказиш эҳтимолини ҳам истисно қилмаяпти. Бу ҳақда РИА Новости эълон қилган таҳлилий материалда сўз боради.

Декабрь охирида Дональд Трамп анъанавий “рождество” табриги чоғида АҚШ ҳарбийларига мурожаат қилиб, Лотин Америкасидаги вазиятни алоҳида тилга олди. Унга кўра, АҚШ соҳиллари яқинида ўтказилаётган операциялар натижасида наркотиклар контрабандаси 96 фоизга қисқартирилган. Қолган қисми эса қуруқлик орқали олиб ўтилмоқда. Шу боис Трамп операцияни кенгайтириш зарурлигини таъкидлаб, “энди ерда кураш олиб борамиз”, дея баёнот берди. Бироқ амалиёт қачон бошланишини аниқ айтмади.

Шу билан бирга, АҚШ маъмуриятидан қарама-қарши сигналлар ҳам янграмоқда. Reuters агентлигига изоҳ берган Оқ уй вакили Вашингтон ҳарбийларга ҳозирча Венесуэла нефтини блокада қилишга эътибор қаратиш топширилганини, камида икки ой давомида кескинлашув режалаштирилмаганини билдирган.

Санкт-Петербург давлат университети профессори Виктор Хейфецнинг таъкидлашича, АҚШ ҳарбий қудратига қарамай, ҳозирча қуруқликда кенг кўламли операция ўтказиш учун етарли ресурсга эга эмас. Унинг ҳисоб-китобига кўра, 15 минг нафар ҳарбий ва Колумбиядаги кучлар ҳам бу учун камлик қилади. Қўшимча контингент жўнатиш эса катта вақт ва молиявий харажат талаб қилади.

Экспертнинг фикрича, яна бир жиддий хавф — эҳтимолий йўқотишлар. АҚШ кичик давлатларга қарши операцияларда ҳам йўқотишларга учраган. Венесуэлада эса қаршилик кучли бўлиши мумкин, чунки мамлакатда Уго Чавес даврида ташқи тажовузга қарши партизанлик кураши концепцияси ишлаб чиқилган. Бу эса мутлақо башорат қилиб бўлмайдиган оқибатларга олиб келиши мумкин.

Россия Фанлар академиясининг АҚШ ва Канада институтининг етакчи илмий ходими Владимир Васильев эса АҚШ қуруқлик операцияси бўйича қарорни аллақачон қабул қилган, деб ҳисоблайди. Унинг айтишича, “рождество” таътиллари сабаб ҳозирча фаол ҳаракат йўқ, аммо Янги йилдан кейин жиддий қадамлар кутилмоқда. Бу ҳаракатлар аниқ зарбалар ёки маҳаллий беқарорлаштириш уринишлари кўринишида бўлиши мумкин.

Айни пайтда АҚШ Венесуэлага нисбатан асосан иқтисодий босимни кучайтирмоқда. Ҳозиргача мамлакат соҳиллари яқинида камида учта нефть танкери ушлаб қолинган. Дональд Трамп бу нефть АҚШ назоратида қолишини, заруратга қараб сотилиши ёки стратегик захираларда ишлатилиши мумкинлигини айтди. Экспертлар фикрига кўра, АҚШ учун бу ўта хавфли йўл бўлиб, мамлакат ўз қўли билан яратган можарога чуқурроқ ботиб кетиши мумкин.