Тошкент вилоятида кучли таъсир қилувчи дори воситалари савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, ўтказилган тезкор тадбир давомида «Наманган-Тошкент» йўналишида ҳаракатланиб келаётган «CАПТИВА» русумли автомашина тўхтатилиб кўздан кечирилган.

Аниқланишича, фуқаролар У.И. ва Х.С. (муқаддам судланган) хорижда ишлаб чиқарилган 445 дона «Регапен» номли кучли таъсир қилувчи дори воситасини Тошкент шаҳрида ўтказиш мақсадида олиб келаётганлиги аниқланиб, ушбу дори воситалари ашёвий далил сифатида расмийлаштириб олинган.

Шу каби яна бир ҳолат, департаментнинг Қибрай тумани бўлими ҳамда бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда ҳам фош қилинган.

Унга кўра, фуқаро С.Р.нинг ёнидан 37 дона капсуладаги кучли таъсир қилувчи дори воситалари топилиб, тезкор тадбир ходимлари томонидан ашёвий далил сифатида олинган.

Ҳозирда мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари бошлаб юборилган.