«Honda» ва «Nissan» 2025 йил июнь ойигача янги ҳолдинг компания тузиш орқали бирлашиш бўйича келишувга эришишни режалаштирмоқда. Бу ҳақда «Reuters» ахборот агентлигига маълум қилинди. Япониянинг ушбу икки автомобил гиганти дунёдаги учинчи йирик автомобил ишлаб чиқарувчи гуруҳни яратиши кутилмоқда.

«Honda» «Тоёта»дан кейинги йирик автомобил ишлаб чиқарувчи, 40 миллиард АҚШ долларлик бозор қийматига эга, «Nissan» эса 10 миллиард АҚШ доллар билан учинчи ўринда туради. Уларнинг янги бирлашган ҳолдинги 2026 йил август ойида аксияларни рўйхатга киритиши ва шу билан бир вақтда «Honda» ва «Nissan» компаниялари аксияларининг делистациясини амалга ошириши кутилмоқда. «Honda» ҳолдинг компаниясининг бошқарув кенгашида кўпчилик ўринни эгаллаши режалаштирилган.

Мазкур бирлашув «Fiat Chrysler» ва «PSA» компаниялари 2021 йилда «Stellantis» компаниясини яратганидан кейинги энг катта автомобил саноати ислоҳоти бўлади. «Honda» ва «Nissan»нинг янги компаниясига «Mitsubishi Motors» ҳам қўшилиши мумкин. Бу эса уларнинг глобал автомобил сотувини 8 миллиондан ошириб, «Hyundai» ва «Kia» гуруҳларидан ўтиб кетишига имкон беради.

Июн ойигача келишув якунига етказилиб, «Mitsubishi Motors» билан қўшилиш юзасидан ҳам музокаралар ўтказилиши режалаштирилган. Япон автомобилсозлари электрлаштириш ва дастурий таъминот ишлаб чиқишда ҳамкорлик қилиш бўйича 2023 йилда келишувга эришган эди.

Ушбу бирлашув «Tesla» ва Хитой автомобил ишлаб чиқарувчиларидан келаётган қаттиқ рақобатга жавоб сифатида кўрилмоқда. Келажакда, янги ташкил этилган компания, электр автомобиллар ва илғор технологиялар бўйича ўз кучини бирлаштириб, саноатда етакчи ўринни эгаллашни мақсад қилган.

Янги ҳолдинг ташкил этилиши ҳақидаги расмий эълон келаси душанба куни бўлиб ўтади. Тадбирда «Mitsubishi Motors» ва бошқа муҳим ҳамкорлар ҳам иштирок этиши кутилмоқда.