АҚШ Давлат котиби Марко Рубио якшанба куни маълум қилишича, АҚШ Венесуэла президенти Николас Мадуро ва яна бир қатор юқори лавозимли амалдорлар бошчилигидаги «Kartel de los Soles»ни шу ойда хорижий террорчилик ташкилоти сифатида эълон қилади.

«Мадуро ҳам, унинг атрофидагилар ҳам Венесуэланинг қонуний ҳукуматини ифодаламайди», — дейилади АҚШ Давлат департаментининг матбуот баёнотида. Ҳужжатда қайд этилишича, «Kartel de los Soles» ва бошқа халқаро жиноий гуруҳлар АҚШ ҳамда Европага гиёҳванд моддалар етказиб беришда иштирок этмоқда.

24 ноябрдан кучга кириши кутилган айблов Қўшма Штатларнинг Кариб денгизидаги ҳарбий фаолияти ошган бир пайтга тўғри келмоқда. Яқинда АҚШ дунёдаги энг йирик авиаташувчидан бирини Венесуэла қирғоқлари яқинига жойлаштиргани ҳам шунга мисол.

Президент Дональд Трамп ва Николас Мадуро ўртасидаги кескинлик охирги ҳафталарда янада кучайди. АҚШ қўшинлари гиёҳванд моддалар савдоси билан боғлиқ деб ҳисобланган бир қатор операцияларни нишонга олган. АҚШ кучлари дам олиш кунлари гиёҳванд моддалар ташишда гумон қилинган кемага 21 марта зарба бергани қайд этилган.

Трамп якшанба куни «Kartel de los Soles»ни террорчи ташкилот сифатида белгилаш АҚШ армиясига Мадуронинг мамлакат ичидаги айрим активларини ва инфратузилмасини нишонга олиш имкониятини бериши мумкинлигини айтди.

Шу билан бирга, у Мадуро маъмурияти билан айрим мулоқотлар ҳам олиб борилаётганини тасдиқлади. Президент ўтган жума куни Венесуэлага оид ҳарбий чоралар ҳақида қарор қабул қилинганига ишора қилган бўлса-да, ҳозирча кескин ҳаракатлар кузатилмаяпти.

Трампнинг таъкидлашича, Венесуэладаги эҳтимолий ҳарбий ҳаракатлар учун маъмурият Конгресс рухсатига муҳтож эмас:

«Биз Конгресснинг иштирокини қўллаб-қувватлаймиз. Биз мамлакатга гиёҳванд моддалар кириб келишини тўхтатиш учун ҳаракат қилмоқдамиз… Бу борада уларнинг розилиги шарт эмас. Лекин уларга билдириб қўйган ҳам маъқул», — деди у.

CNN таҳлилчиларига кўра, АҚШнинг картелларни «террорчи ташкилот» сифатида аташи санкциялар қўллаш имконини беради, аммо бевосита ҳарбий ҳужум уюштириш ҳуқуқини тақдим этмайди.

Давлат департаменти маълумотига кўра, Конгрессда хорижий террорчилик ташкилоти мақомини кўриб чиқиш учун етти кун бор. Агар ушбу муддат ичида Конгресс томонидан қаршилик билдирилмаса, қарор кучга киради.

Шу йил бошида Марко Рубио хорижий террорчилик ташкилоти мақоми АҚШга бу гуруҳларни нишонга олиш имкониятини берганини эслатиб, шундай деган эди:

«Биз уларга шунчаки гиёҳванд моддалар савдоси билан шуғулланувчи тузилмалар эмас, балки қуролли террорчи ташкилотлар сифатида қарашни бошлашимиз керак».