Иллюстратив фото

Россия томонидан Украина билан меморандум устида иш жадал давом этмоқда. Бу ҳақда Кремль матбуот котиби Дмитрий Песков маълум қилди.

“Ҳеч ким жараённи кечиктиришдан манфаатдор эмас. Ҳамма динамик ишламоқда. Биз сизни хабардор қилиб турамиз”, — деди Кремль матбуот котиби журналистларга.

Унинг таъкидлашича, меморандум бўйича ишларнинг аксарияти дискрет тарзда амалга оширилади ва оммавий бўлмаслиги керак. Шунингдек, томонлар ўт очишни тўхтатиш шартлари рўйхатини алоҳида тайёрлайди.

Шунингдек, 1000 нафарга 1000 нафар маҳбус алмашинувига тайёргарлик кўрилмоқда, кейинги музокаралар жойи тўғрисида эса қарор ҳали қабул қилинмаган. Бундан ташқари, Москва Ватикандан келишув доирасидаги ҳамкорлик бўйича аниқ таклифларни олмаган ҳамда Россия можарони тугатишга ҳисса қўшмоқчи бўлган барча давлатларнинг саъй-ҳаракатларини олқишлайди.

Аввал хабар қилганимиздек, Москва ва Киев вакилларининг учрашуви 16 май куни Истанбулда бўлиб ўтди. Россия делегациясига раҳбарлик қилган президент ёрдамчиси Владимир Мединский Украина билан кенг миқёсда — 1000 нафарга 1000 нафар асир алмашишни эълон қилди. Бундан ташқари, томонлар келажакдаги ўт очишни тўхтатиш имкониятлари ҳақидаги тасаввурни тақдим этишга келишиб олдилар.

Украина томони музокаралар чоғида давлат раҳбарларининг учрашувини ўтказишни сўради. Москва, ўз навбатида, буни ҳисобга олди. Мединский, шунингдек, Россия мулоқотни давом эттиришга тайёрлигини қайд этди.

Душанба оқшомида Россия президенти Владимир Путин ва АҚШ президенти Дональд Трамп телефонда икки соатдан ортиқ суҳбатлашди. Россия раҳбарининг музокаралар якунлари бўйича хабар беришича, Москва Киев билан меморандум, жумладан, ўт очишни тўхтатиш бўйича ишлашга тайёр.

Ўз навбатида, Оқ уй раҳбари суҳбатдан сўнг Россияга қарши янги санкциялар жорий қилмаслигини, чунки можарони ҳал қилиш имконияти борлигини айтди.

Аммо бу Европа Иттифоқи давлатлари томонида ижобий қабул қилинмади ва улар Трампни тўғридан тўғри музокаралар учун Путинга босим қила олмаганликда айблади ҳамда Россияга нисбатан янги санкцияларни эълон қилди.

Европа Иттифоқининг 17-санкциялар пакетига кўра, «қора рўйхат»га Россиянинг 200 тага яқин танкери киритилди. Аммо бу танкерлар қайси давлат байроқлари остида ҳаракатланаётганига аниқлик киритилмаган. Уларга нисбатан чекловлар Европа Иттифоқи портларига киришни ва Европа компанияларининг ушбу кемалар билан ҳар қандай операцияларини тақиқлашни англатади.

Бунгача Россиянинг 1651 жисмоний, 742 юридик шахси Европа Иттифоқи санкциялари рўйхатига тушиб бўлганди.