Яқин Шарқни беқарорлаштирган ва Ғазони вайрон қилган 15 ойлик жангларни тўхтатиш, қамалдаги Фаластин анклавига кўпроқ ёрдам кўрсатиш ҳамда ҲАМАС томонидан гаровга олинган ўнлаб одамларнинг қайтарилишини таъминлаш бўйича келишув яқин орада эълон қилиниши ҳақида оптимизм билдирилди.

Икки исроиллик расмийнинг сўзларига кўра, Доҳадаги музокарачилар томонидан якунланаётган сулҳ битимининг биринчи босқичида ҲАМАС 33 нафар гаровга олинганларни озод қилиши кутилмоқда. Бу бир неча ой ичида Исроил-ҲАМАС урушида сулҳ имзоланиши мумкинлиги ҳақидаги биринчи ижобий белгидир.

АҚШ президенти Жо Байден ҳам душанба куни ташқи сиёсатга бағишланган нутқида ушбу можароларни тезроқ тугатишга уринилаётганини таъкидлади.

«Келишувлар Исроил хавфсизлигини таъминлайди ва урушда даҳшатли жабр кўрган фаластинликларга инсонпарварлик ёрдамини сезиларли даражада ошириш имконини беради. Улар ҳақиқий дўзахни бошдан кечиришди», деган Байден.

33 нафар гаровга олинганларнинг озод этилиши битимнинг биринчи босқичи бўлади. Урушни тугатиш учун мўлжалланган иккинчи босқичга эришиш бўйича музокаралар битим амалга оширилишининг 16-кунида бошланади.

Расмийнинг айтишича, исроилликларни ўлдиришда айбдор деб топилган фаластинлик маҳбуслар шунчаки озод этилмайди, балки Ғазо секторига ёки хорижий давлатлар билан тузилган келишувлардан кейин хорижга қўйиб юборилади.

Яқин келажакда муросага келиш борасида ишлар олиб борилмоқда, аммо бу қанча вақтни олиши номаълум.