21 январь куни Озарбайжоннинг «Қорабоғ» жамоаси УЕФА Чемпионлар лигаси мусобақасининг 7-тури доирасида Германиянинг “Айнтрахт” клуби билан куч синашди. Учрашув 3:2 ҳисобида Озарбайжон чемпионининг ғалабаси билан якунланди.

Учрашувни бошқариб борган ҳакам Сандро Шерер ўйин давомида бир неча бор баҳсли қарорлар қабул қилди ва бу қарорларнинг асосий қисми «Қорабоғ» жамоаси зарарига хизмат қилди.

Ўйиндан сўнг ҳакамлик ҳақидаги муҳокамалар шунчалик қизиб кетдики, бу масалада Озарбайжон мамлакатининг Президенти ҳам ўзининг ижтимоий тармоқдаги саҳифасида фикр билдирди.

“Қорабоғ” футбол клубини Чемпионлар лигасининг асосий босқичида “Айнтрахт” жамоаси устидан қозонилган ёрқин ғалаба билан чин қалбимдан табриклайман!

Ҳакамларнинг адолатсиз ва ноҳақ қарорларига қарамай, адолат қарор топди. УЕФА томонидан тайинланган ҳакамлар ўзларининг ноҳақ ва нохолис қарорлари билан “Қорабоғ”нинг ғалабасини тўсмоқчи бўлаётгани биринчи марта эмас. Умид қиламанки, УЕФА бу ҳакамларни тегишли тартибда жазолайди.

Адолат ва ҳақиқатни енгиб бўлмайди. Яшасин “Қорабоғ”, деб ёзган Илҳом Алиев ўзининг X тармоғидаги саҳифасида.