Кеча, 20 февраль куни Сирдарё вилояти Гулистон шаҳрида Ўзбекистон енгил атлетика федерацияси томонидан Спортни ривожлантириш вазирлиги, Миллий Олимпия қўмитаси ҳамда Сирдарё вилояти ҳокимлиги кўмагида «Save Aral» халқаро хайрия пойгасининг навбатдаги мавсумига старт берилди.

Жорий йилги марафоннинг илк стартида 2 мингга яқин қатнашчи иштирок этди. Қизлар ўртасида маррага биринчи бўлиб тошкентлик Анастасия Силченкова етиб келган бўлса, финиш чизиғини иккинчи бўлиб сирдарёлик Дария Антропова босиб ўтди. Фахрли 3-ўрин эса Деспина Бандалетова (Сирдарё вилояти)га насиб этди.

Ўғил болалар ўртасида сирдарёлик Виктор Тсуренко ғолиб бўлди. 2-ўринни Тошкент шаҳри вакили Файзулла Пўлатхўжаев банд қилди. Кучли учликни эса яна бир Сирдарё вилояти вакили Фахриддин Амутов якунлаб берди.

Шунингдек, ташкилотчилар томонидан турли номинациялар бўйича ғолиблар аниқланди:

«Энг ёш иштирокчи» (қиз болалар ўртасида) – Машҳура Ибрагимова (7 ёш),

«Энг ёш иштирокчи» (ўғил болалар ўртасида) –Аюбхон ва Амирхон Сариновлар (3 ёш),

«Энг ёши катта аёл иштирокчи» – Шаҳло Мирзақулова (46 ёш),

«Энг ёши катта эркак иштирокчи» – Шаҳзод Аҳмедов (62 ёш),

«Энг фахрий иштирокчи» – Қўзибой Абдуллаев (74 ёш),

«Энг фаол ташкилотчи» – Ҳабибулло Шодиев,

«Енгил атлетика фидойиси» – Роза Зянгурова,

«Доимий ҳамкорлик учун» – Ўзбекистон енгил атлетика федерацияси.