Иллюстратив фото

Германияда болалар ўртасида зотилжам (пневмония) ҳолатлари кўпайган. Хусусан, маҳаллий “Focus” журналининг маҳаллий тиббиёт муассасаларига таяниб хабар беришича, мамлакатда микоплазма зотилжамининг биринчи ҳолатлари қайд этилган.

Таъкидланишича, бундай ташхис қўйилган беморларнинг аксариятини болалар ташкил этмоқда. Шу билан бирга, шифокорларнинг фикрига кўра, инфекция асосан 5 ёшдан 16 ёшгача бўлган болаларда аниқланган.

“Баъзи ҳолатларда ҳақиқатдан ҳам касалликни оғир ўтишини кузатяпмиз”, дейди болалар пульмонологи, Альтона болалар касалхонасининг тиббий директори Филипп Сток.

Мутахассиснинг фикрига кўра, беморлар кўпинча оғриқли йўталдан шикоят қиладилар. Ўз навбатида, шифокорлар нафас олиш йўлларининг “жуда аниқ” торайиши ва томоқ шиллиқ қаватининг яллиғланишини қайд этганлар.

Шифокорнинг таъкидлашича, микоплазма зотилжами бўлган болалар етти кундан ўн кунгача касалхонада даволаниши талаб этилади. Бироқ, Стокнинг таъкидлашича, ҳеч бир ҳолатда беморларнинг ҳаётига хавф туғилмайди.

Шу йилнинг ноябрь ойида Хитойда вояга етмаганлар ўртасида респиратор касалликларнинг кўпайиши қайд этилганди. Кейинчалик Жаҳон соғлиқни сақлаш ташкилоти (ЖССТ) вакили Маргарет Харрис мутахассислар микоплазма зотилжамини пандемия потенциали, деб ҳисобламаслигини айтди.

Олдинроқ, Қозоғистонда болалар орасида қизамиқ кенг тарқалгани ҳақида хабар бергандик.