Фото: Reuters

Халқаро энергетика агентлиги (ХЭА) раҳбари Фотиҳ Биролнинг айтишича, газнинг “олтин даври” ниҳоясига етмоқда. 2030 йилга бориб иқтисодиёти ривожланган мамлакатларда унга талаб камаяди. Бунинг сабаблари сифатида у қайта тикланадиган энергия манбалари рақобати ва Европанинг Россия газидан тез воз кечишини кўрсатди.

“Ушбу ўн йилликнинг охирида иқтисодиёти ривожланган мамлакатларда газга бўлган талаб пасаяди. Бу қайта тикланадиган энергия манбаларининг электр энергияси ишлаб чиқаришда газдан кўпроқ устунлиги билан боғлиқ... Қолаверса, Россиянинг Украинадаги “махсус ҳарбий операция”си бошланганидан кейин Европанинг газдан воз кечиши тезлашган”, — дейди Бироль.

2011 йилда ХЭА газнинг “олтин даври”ни акс эттирган ва унинг қазиб олиш ҳажми сезиларли даражада ошишини башорат қилган ҳисоботни эълон қилган эди. Бироқ, ҳозир, Биролнинг сўзларига кўра, янги яшил сиёсатсиз ҳам, газ талаби келгуси йилларда энг юқори чўққига чиқади.

Шу билан бирга, ХЭА раҳбари пасайиш ривожланган мамлакатлар учун хос бўлишини таъкидлади. Унинг қўшимча қилишича, ривожланаётган мамлакатларда, айниқса, Осиёда газга бўлган талаб ўсишда давом этади. Шунинг учун нефть ва газ саноатига сармоя киритиш ҳали ҳам ишлаб чиқариш кескин пасайиб кетмаслиги учун зарур.