Президентимизнинг 2025 йил 11 сентябрдаги фармонига асосан Хоразм вилояти ҳудудида яшовчи 1 нафар фуқаролиги бўлмаган шахснинг фуқаролиги тикланди, 3 нафар фуқаролиги бўлмаган шахслар Ўзбекистон Республикаси фуқаролигига қабул қилинди.

Вилоят ҳокими Жўрабек Рахимов ушбу шахсларга Ўзбекистон Республикаси фуқаролиги ID-картасини тантанали равишда топширди. Фуқароликка қабул қилинган юртдошларимиз кўп йиллик орзу-умидлари ушалганини чин дилдан эътироф этиб, Президентимизга миннатдорлик билдирди.

— Ўзбекистонда доимий истиқомат қилиб, Ватанимиз тараққиётига ўзларининг муносиб ҳиссасини қўшиб келаётган элдошларимиз қаторида мен ҳам Ўзбекистон Республикаси фуқаролигига қабул қилиндим, — дейди Боғот туманида истиқомат қилувчи Олим Жуманиёзов. — Бунинг учун давлатимиздан, бағрикенг Президентимиздан умрбод миннатдорман. Шундай меҳр-оқибатли мамлакатнинг тенг ҳуқуқли фуқароси эканимдан ғурурланаман. Бу тарихий сана мен ва оиламиз аъзолари учун энг қувончли, унутилмас кун бўлиб қолди. Бу хайрли ишлар юртимизда инсон манфаатлари, қадр-қиммати юксак даражада улуғланишининг яна бир амалий ифодасидир. Жонажон юртимизга кўз тегмасин, халқимиз турмуши фаровонлиги йўлида амалга оширилаётган эзгу ишлар бардавом бўлсин.

Одилбек ОДАМБОЕВ

«Халқ сўзи».