Ботир МАДИЁРОВ/«Халқ сўзи». Франциянинг «Montagne et Neige Développement» компанияси Шоҳимардонда арқон йўл ва осма кўприкларни ўз ичига олган оммавий туризм маскани барпо этиш бўйича амалий ишга киришди. Шу муносабат билан Фарғона вилояти ҳокимлигида бўлиб ўтган учрашувда лойиҳа концепцияси тақдим этилди.

Айтиш жоиз, жорий йилнинг 6 июнь куни ўтказилган мулоқотда ушбу лойиҳани ҳаётга татбиқ этиш истиқболлари муҳокама қилинган ва унинг концепциясини ишлаб чиқишга келишилган эди.

— Бу лойиҳада арқон йўли, қия кўтаргич, осма кўприк, замонавий аттракционлар ва бошқа туризм инфратузилма объектлари мужассамлаштирилган, — дейди компаниянинг ҳудудий директори Орхан Ширин. — Лойиҳани амалга оширишда компания табиат билан уйғунликни таъминлаш ҳамда оилавий туризмни ривожлантиришга катта эътибор қаратган. Айни жиҳатларни инобатга олиб, лойиҳа концепцияси маҳаллий ҳамкорларимиз тавсиялари асосида ишлаб чиқилди.

Учрашувда лойиҳани молиялаштириш учун Франция тараққиёт банки ҳамда Европа банклари билан музокаралар олиб боришга келишиб олинди.